Respýblıkalyq «Uly Dala rýhy» festıvali ulttyq sport túrlerinen uzaq merzimge josparlanǵan aýqymdy joba ekenin aıta ketken jón. Festıvaldiń maqsaty – Prezıdent N.Nazarbaevtyń «Rýhanı jańǵyrý» ıdeıasyn júzege asyrý, ulttyq sport túrleriniń qoǵamdyq sıpat alýyna, júıeli damýyna tyń serpin berý. Baspasóz máslıhatyna Mádenıet jáne sport mınıstrligi Sport jáne deneshynyqtyrý isteri komıtetiniń tóraǵasy Serik Jarasbaev pen Ulttyq sport túrleri qaýymdastyǵynyń prezıdenti Bekbolat Tileýhan qatysty.
S.Jarasbaev óz sózinde atalǵan festıvaldiń mańyzyn atap ótti. «Mádenıet jáne sport mınıstrligi Astananyń 20 jyldyǵyn merekeleý aıasynda biraz aýqymdy sporttyq sharalardy qolǵa aldy. «Uly Dala rýhynyń» ereksheligi – festıval elimizdiń barlyq óńirin qamtıdy. Astana ortalyq bolady, úsh aıdan soń aqtyq jarystar elordada uıymdastyrylady», dedi Serik Maratuly.
B.Tileýhan Uly Dala rýhymen qatar, Astananyń týǵan kúnine arnalǵan «Astana kýbogy» báıgesi týraly tilge tıek etti. «Bıyl Astana qalasynyń 20 jyldyǵyn merekeleý keń aýqymda qolǵa alyndy. Jyl basynda «20 jyldyqqa – 20 is-shara» atty naýqan bastaǵanbyz. Osy joba boıynsha biraz shara ótkizdik. Sondaı-aq Astananyń týǵan kúnine «Astana kýbogy» at jarysyn josparladyq. Bul báıge eki qashyqtyq boıynsha ótedi. Alaman – 25 shaqyrym, ekinshi báıge – 16 shaqyrym. Astana kýbogyn sarapqa salýǵa respýblıkamyzdyń barlyq oblystary, Astana, Almaty qalalarynyń atbegileri 2 júırikten qosa alady», dedi B. Tileýhan.
4 shilde kúni bastalyp, 16 qyrkúıek kúni aıaqtalatyn jastar arasyndaǵy festıvalǵa respýblıka boıynsha 7073 sportshy qatysady. Ulttyq sporttyń kókpar, báıge, teńge ilý, aýdaryspaq, jamby atý, qazaq kúresi, toǵyzqumalaq, asyq atý túrlerinen ótetin jarystar komandalyq tártipte júrgiziledi.
Úsh aıdan astam ýaqytqa sozylatyn bul festıval II kezeńge bólingen. I kezeń – aımaqtyq irikteý jarystary. Alǵashqy kezeń básekesi tórt aımaqta ótedi. 4 shilde kúni Qazmedıa ortalyǵynda festıvaldiń ashylý saltanaty jáne jerebe tartý rásimi bolady. Osy jerebe boıynsha ótetin respýblıkamyzdyń Ońtústik, Shyǵys, Batys jáne Soltústik aımaqtaryndaǵy jarystardyń saltanatty ashylýy ár merzimge belgilengen. Atap aıtqanda, 13-15 shilde kúnderi Shymkent qalasynda Ońtústik aımaq, 27-29 shilde kúnderi Aqtóbe qalasynda Batys aımaq, 13-15 tamyz kúnderi Pavlodar qalasynda Shyǵys aımaq, 17-19 tamyz kúnderi Astana qalasynda Soltústik aımaq jarystarynyń saltanatty ashylýy ótkiziledi.
Sondaı-aq kókpar, qazaq kúresi, toǵyzqumalaq, asyq atý sport túrleriniń irikteý básekelerin aımaqtyq óńirlerde, al aýdaryspaq, jambyatý, teńge, báıge sport túrleriniń irikteý básekelerin Astanada ótkizý josparlanǵan. Aımaqtardaǵy irikteý jarystary 31 tamyzda márege jetedi. Elimizdegi 14 oblys, 3 qala komandalary arasynan úzdik shyqqan komandalar festıvaldiń II kezeńine ótedi.
Astana qalasynda 11-16 qyrkúıek kúnderi aralyǵynda ótetin II kezeńge 250-ge jýyq sportshy qatysady dep kútilýde. Festıvaldiń II kezeńińde jartylaı fınal men fınaldyq básekeler tamashalanady.
Raýan QAIDAR,
«Egemen Qazaqstan»
