Sýretti túsirgen Erlan OMAR
Býrabaıdyń kógildir qyrqa jotalarymen kókteı ótip, Oqjetpestiń ózimen boı talastyratyn, álemde sırek kezdesetin osy zamanǵy talaptarǵa saı tramplın alystan kóz tartady. Bul nysan – jalǵyz taý shańǵysy ǵana emes, elimizdegi týrızmniń damýyna aıryqsha serpin beretin nysan. Tramplındi shańǵy sportynyń respýblıkalyq bazasynyń aýmaǵy 125,54 gektardy quraıdy. Qurylys jumystary eki kezeńmen júzege asyryldy. Birinshi kezeńde aýmaǵy 111 gektardy alyp jatqan shańǵy bazasy iske qosylsa, ekinshi kezeńde 90 jəne 125 metrlik tramplınnen sekirý nysany paıdalanýǵa berildi. Mádenıet jáne sport mınıstrliginiń ǵalamat shańǵy bazasy ústimizdegi jyldyń naýryz aıynda ashylǵan bolatyn. Keshendi Elbasy Nursultan Nazarbaevqa Mádenıet jáne sport mınıstri Arystanbek Muhamedıuly tanystyryp kórsetti. Bul shańǵy bazasy qysy-jazy jumys isteıtin bolady. Atalmysh sport keshenin salýǵa barlyǵy 38 mıllıard teńge qarjy jumsaldy. Shańǵy bazasy qysqy sport túrleri (shańǵy jarysy, bıatlon, tuǵyrdan sekirý) boıynsha əlemdik talaptarǵa saı salynǵan. Nysanǵa shańǵy joly, 90 jəne 125 metrlik bıiktikten sekirý tuǵyry (tramplın), 200 oryndyq qonaq úı, 250 oryndyq ashana, júzý basseıni, dərigerlik-saýyqtyrý ortalyǵy kiredi.
Memleket basshysynyń sapary kezinde jańa shańǵy bazasynda 200-den astam sportshynyń oqý-jattyǵý jıyny ótip jatqan bolatyn. Qazaqstannyń tramplınnen sekirý sportynyń eń myqty has sheberleri paıdalanýǵa berilip otyrǵan jańa keshenniń óte sapaly ekendigin ózderiniń sheberlikterimen kórsetti.
Elbasyna «Týrıstik Qazaqstan» baǵdarlamasynyń aldaǵy ýaqytta júzege asyrylýy jáne «Shýche-Býrabaı» kýrortty aımaǵyn damytý boıynsha atqarylyp jatqan jumystar týraly Premer-Mınıstrdiń birinshi orynbasary Asqar Mamın, Mádenıet jáne sport mınıstri Arystanbek Muhamedıuly jáne Aqmola oblysynyń ákimi Málik Myrzalın baıandap berdi.
Baıandamalardy tyńdaǵan soń Memleket basshysy Qazaqstannyń týrıstik áleýetin arttyrýdyń ózektiligin aıtty.
– Osyǵan deıin týrızmdi damytýǵa tolyq múmkindigimiz bolmady. Ár nárseniń óz ýaqyty bar. Jaǵdaıy bar qazaqstandyqtar shetelderdegi kýrorttarǵa baryp demalyp júrdi. Endigi ýaqytta Qazaqstannyń kórkem jerlerin otandastarymyzǵa ǵana emes, sheteldikterge de kórsetetin ýaqyt jetti. Týrızmdi ekonomıkanyń bir salasy dep esepteýimiz kerek. Qazir «Shýche-Býrabaı» kýrortyna qatynaýǵa barlyq jaǵdaı jasalǵan. «Astana-Býrabaı» avtobany salyndy. Temir jol bar. Kókshetaýdyń áýejaıy jumys istep tur. Endi Býrabaı kentiniń ishki joldaryn salyp, abattandyryp, demalýshylarǵa qolaıly jaǵdaı týǵyzýymyz qajet. Bul oblys ákiminiń sharýasy. Jalpy, Býrabaıda ǵana emes, Imantaý, Shalqar, Baıanaýyl, Túrkistanda da týrızmdi damytýdy qolǵa alýymyz qajet. Túrkistan týrızmdi damytýǵa óte qolaıly. Eń bastysy, ınfraqurylymdy durystaýymyz kerek. Men barlyq oblystyq ákimdikterge tapsyrma beremin, Býrabaı kýrorty týrısterdiń arqasynda bıýdjetke tabys ákeletin bolady, – dedi Elbasy Nursultan Nazarbaev óz sózinde.
Elbasy búginde 10 týrıstik aımaqqa basa nazar aýdarylatynyn aıtty. Olar – Imantaý, Baıanaýyl, Túrkistan, Almaty oblysy, Sharyn shatqaly, Alakól, Kaspıı jaǵalaýy jáne basqalary. «Býrabaıdan keıin Imantaý-Shalqar kýrortty aımaqtary bar. Pavlodar oblysynda Baıanaýyl kýrortynyń áleýeti zor. Túrkistan erekshe mańyzǵa ıe. Ol jerde jaqsy týrıstik ortalyq qalyptastyrýmyz kerek. Týrızm Túrkistanda qazirdiń ózinde bar. Ár jyl saıyn oǵan 1,5 mıllıonǵa jýyq týrıst keledi», – dep atap ótti N.Nazarbaev. Memleket basshysy Almatydaǵy taý shańǵysy kýrorty jáne Sharyn shatqaly týraly da aıtyp ótti.
– Eger biz ınfraqurylymdy salatyn bolsaq, bul kólemdi kóbeıtýge ábden bolady. Almaty oblysyndaǵy taý shańǵysy kýrorty týraly aıtyp otyrmyz. Ony aldaǵy ýaqytta barynsha damytý qajet. Bul jóninde jospar da, ıdeıa da bar. Sharyn shatqalyn elimizde bilmeıtin adam kemde-kem. Tipti sheteldikterdiń ózi ony Soltústik Amerıkadaǵy ataqty shatqalmen salystyrady. Biz elimizdiń sulý tabıǵaty týraly jıi aıta bermeımiz. Sondyqtan, muny myqtap qolǵa alý qajet, – dedi Elbasy.
Sonymen qatar Memleket basshysy týrıstik nysandarǵa sýbsıdııa bólý kózdelip otyrǵanyn atap aıtty.
– Týrısterdi básekege qabiletti baǵa bolǵanda ǵana tarta alamyz. Ekonomıkanyń osy salasyna zor mán berýimiz kerek, – dedi Qazaqstan Prezıdenti.
Premer-Mınıstrdiń birinshi orynbasary Asqar Mamın Nursultan Nazarbaevqa elimizde týrızm salasyn damytý baǵytynda atqarylyp jatqan jumys týraly baıandap berdi.
– Sizdiń tapsyrmańyzǵa oraı, Úkimet «Qazaqstan týrısteri aǵyny» memlekettik jobasyn ázirleý boıynsha jumys júrgizýde. Jobanyń 7 basym baǵyty bar. Onda týrızm salasynda básekelestikti óristetý máselesin túbegeıli sheship, el ekonomıkasynyń 33 salasyn biriktirý kózdelip otyr. Bizdiń negizgi maqsatymyz 2023 jylǵa deıin qazirgi ekonomıkadaǵy týrızmniń úlesin 1,9 prosentten 8 prosentke deıin ulǵaıtý, – dedi Asqar Mamın.
Onyń oıynsha, bolashaqty boljaǵan kórsetkish álemniń jaqsy damyǵan memleketteriniń deńgeıinde bolmaq.
– Qazirgi kezde quramyna 60-tan astam týrıstik obekti kiretin týrıstıfıkasııa kartasy ázirlený ústinde. Osy topqa kiretin 10 týrıstik jobany júzege asyrý úshin 70 paıyzy jeke ınvestor esebinen qarjylandyrylatyn quny 21,4 trıllıon teńge ınvestısııa tartý qajet, – dedi birinshi vıse-premer.
Sonymen qatar A.Mamın elimizdegi týrıster aǵynyn arttyrý barysyndaǵy josparymen bólisti.
– 2023 jyldarǵa qaraı biz týrıster aǵynyn 2 mıllıon adamǵa jetkizýdi kózdep otyrmyz. Buǵan qosa ishki týrızmdi 500 myń adamnan 2 mıllıon adamǵa, ıaǵnı tórt esege arttyrýǵa kúsh salamyz, – dedi Úkimet basshysynyń orynbasary.
Al Mádenıet jáne sport mınıstri Arystanbek Muhamedıuly óz sózinde Býrabaı kýrortyn damytý boıynsha qolǵa alynǵan memlekettik baǵdarlamalardy júzege asyrý máselesine toqtala kele, áıgili Gollıvýd prodıýserleri kórkem tabıǵattyń kesteli beınesin somdap, derekti fılm túsirýge qyzyǵýshylyq tanytyp otyrǵanyn jetkizdi.
Býrabaı baýraıyndaǵy jasalyp jatqan ıgi sharalar el týrıziminiń odan ári damýyna sony serpin beretindigi anyq.
Baıqal BAIÁDIL,
«Egemen Qazaqstan»
Aqmola oblysy
