Kezdesý barysynda óńir ekonomıkasyn jańǵyrtý máseleleri qaraldy, sondaı-aq oblys aktıviniń jańa jahandyq shynaıylyq jaǵdaıynda ekonomıkanyń sapaly ári turaqty ósýin qamtamasyz etý úshin qajetti jaǵdaılardy jasaý jumystary talqylandy. Atap aıtqanda ınvestısııalar tartý, ekonomıkanyń negizgi salalaryn, jappaı kásipkerlikti damytý, tehnologııalyq qaıta jaraqtandyrý jáne Indýstrııa 4.0 elementterin engizý, sıfrlandyrý, kadrlardy daıarlaý jáne jańa jumys oryndaryn qurý, sondaı-aq ekonomıkany odan ári ártaraptandyrý tárizdi salalar qaraldy.
Keńesti asha otyryp, Premer-Mınıstr B.Saǵyntaev álemniń damyǵan ozyq 30 eliniń qataryna qosylý úshin Qazaqstan jyl saıynǵy ekonomıkalyq ósimdi 5-6% deńgeıinde qamtamasyz etýi tıis ekenin atap ótti.
«Búginde alty aıdyń qorytyndysy boıynsha el ekonomıkasy 4,1% ósti. 2017 jyl 4% ekonomıka ósimimen aıaqtaldy. Bul jaǵdaıda jarty jyldy 5,1% ekonomıkalyq ósimmen aıaqtap otyrǵan Aqtóbe oblysynyń úlesi eleýli», dedi Premer-Mınıstr oblys ákimdiginiń málimetterine sáıkes jyl sońyna deıin kórsetkishter 5%-ten tómen bolmaıtynyn aıta otyryp.
B.Saǵyntaev atap ótkendeı, atalǵan baǵytta jumysty jalǵastyrý úshin Úkimet óz tarapynan barlyq qajetti sharalardy júzege asyrýda. Jobalyq basqarý isi ınvestorlardyń tıimdi de ońtaıly usynys-pikirlerimen ushtastyrylsa, kózdegen maqsatqa jetý birshama jaqyndaı túsedi. Ári bul – álemdegi damyǵan 30 eldiń qataryna tezirek teńelýdiń basty bir tutqasy dep atap kórsetti Úkimet basshysy.
Elimizde jobalyq basqarýdy júzege asyrýdy talqylaýǵa arnalǵan Úkimet májilisi úshin nelikten Aqtóbe oblysy tańdalǵan? О́ıtkeni óńirde búginde óz jumysyn bastap ketken jobalyq keńseniń qyzmetinde ózge aımaqtar da taǵylym men tájirıbe alarlyqtaı tustar bar. Bul jóninde májiliske qatysýshylarǵa Aqtóbe oblysynyń ákimi Berdibek Saparbaev baıandap berdi. Oblysta ekonomıkalyq ósim bıylǵy jarty jyldyqta respýblıkalyq ortasha kórsetkishten asyp túsip, bes paıyzdyq ósimdi qurady. Munda 12 baǵyt bo-
ıynsha belgilengen basty ındıkatorlar jobalyq basqarýdyń tıimdiligin odan ári kóterýge jáne ekonomıkanyń damý qarqynyn birqalypty, turaqty túrde ustaýǵa septigin tıgizýde. Sondaı-aq tabystyń qosymsha kózderin izdestirý jónindegi is-sharalar kesheni de oń nátıjeler berip keledi.
Aımaqta jobalyq basqarý júıesin odan ári tereńdetý úshin qosymsha sharalar alynǵan. Bul birinshi kezekte jumyssyzdyq deńgeıin azaıtý men eńbek ónimdiligin kóterý maqsatyn kózdeıdi. Májiliste salalyq mınıstrlik ókili tarapynan aıtylǵandaı, oblysta eńbek etýge qabiletti 43 5 myń jumys kúshi tirkelgen. Onyń 415 myńy tıisti qyzmetter men jumys oryndaryna tartylǵan. Iаǵnı esepteýler men taldaýlar tek 20 myń adamnyń ǵana óndiristen tys qalǵanyn kórsetedi. Salystyrmaly túrde alǵanda munyń ózi respýblıka óńirleri arasyndaǵy tómengi kórsetkish, ıaǵnı oń turǵydaǵy joǵarǵy kórsetkish bolyp tabylady.
О́ńirde óndiristik kásiporyndardy jańǵyrtýǵa arnalǵan jobalar da májilis kezinde Úkimet basshysy tarapynan qoldaý tapty. Mundaǵy túpki maqsat – buǵan 500 mıllıard teńge qarajat bólý bolmaq. Bıyl bul iske 55 mıllıard teńge qarajat tartylǵan. Soǵan sáıkes 35 kásiporyndy jańǵyrtý jumystary júrgizilýde. Negizinen respýblıkamyzdaǵy kez kelgen óńir basshysy qyzmetiniń reıtıngisi óńirge tartylǵan ınvestısııa mólsherine baılanysty bolatynyn eskersek, bul rette Aqtóbe oblysynyń ákimi Berdibek Saparbaevtyń júzi jarqyn deı alamyz. Aıtalyq ótken jyly óńir ekonomıkasyna tartylǵan sheteldik jáne ishki ınvestısııanyń mólsheri 480 mıllıard teńgeni quraǵan bolsa, bıyl onyń kólemi 510 mıllıardtan kem bolmaıdy dep kútilýde.
Úkimettiń kóshpeli májilisi ústinde Aqtóbe aglomerasııasyn odan ári damytý máselesi de jan-jaqty talqylandy. Qazirgi kezde bul is 8 baǵyt boıynsha júrgizilýde. Sonyń ishinde Aqtóbede ındýstrııalyq aımaqtyń qurylǵany aglomerasııanyń óndiristik bazasyn damytýǵa aıtarlyqtaı áser etken. Aımaqta ońtaıly týrıstik-logıstıkalyq ortalyqtyń bolýy jáne medısınalyq klasterdiń qurylýy aglomerasııanyń qalyptasý úderisin tezdete alady.
Májilis ústinde Aqtóbeniń elimizdegi tórtinshi megapolıs retinde tańdalyp otyrǵany birneshe dúrkin atalyp ótti. Qalanyń burynǵy jaı-kúıi men búgingi jáne keleshektegi damý baǵdary Úkimet basshysy B.Saǵyntaevtyń tóraǵalyǵymen ótkizilgen májilistiń basty arqaýyna aınalýy – bul máselege aıryqsha nazar aýdarylyp otyrǵanyn kórsetedi.
Jıyn barysynda óńirde keıbir salalarǵa qatysty kúrdeli máseleler bar ekeni de aıtyldy. Atap aıtqanda óńirdegi bilim berý júıesine ınvestısııa tartý máselesinde kemshin túsip jatqan tustar joq emes. Bilim salasynda memleket-jekemenshik áriptestigin qoldanysqa engizý deńgeıiniń tómen ekendigi de belgili bolyp otyr. Sondaı-aq
densaýlyq saqtaý men týrızm salalarynda da túbegeıli túrde qolǵa alatyn máseleler bar. Munyń alǵashqysy ókpe aýrýlaryn emdeý dıspanseri qurylysyn aıaqtaýǵa jáne joǵary medısınalyq oqý oryndaryn bitirgen jas mamandarǵa kórsetiletin áleýmettik qoldaý deńgeıin kóterýge qatysty aıtylsa, ekinshisi óńirde týrıstik-aqparattyq ortalyqty qurý isi kesheýildep jatqany jóninde jáne oblysta týrızm salasyn damytýǵa tek eki qyzmetker tartylǵanyna qatysty qozǵaldy.
Májilis ústinde Aqtóbe oblysynyń ákimi Berdibek Saparbaev tarapynan Úkimet basshysy Baqytjan Saǵyntaevtyń nazaryna birneshe usynys-pikirler aıtyldy. Onyń birinshisi oblysta tórtinshi munaı óńdeý zaýytyn salý máselesine qatysty qozǵalsa, ekinshisi elý jyldan astam ýaqyt boıy gaz tasymaldaýmen aınalysyp kele jatqan Buqara – Oral magıs-
traldy gaz aıdaý qubyrynyń múmkindigi men áleýeti shektelip bara jatqanyna baılanysty boldy. Al úshinshisi altyn óndiretin taý-ken baıytý óndiristik kombınatyna qosymsha qarajat qarastyrý turǵysynan kórinis tapty. Premer-Mınıstr alǵashqy máseleniń jaýaby aldaǵy kúzde belgili bolatynyn jetkizdi. Ekinshi máselege qatysty salalyq memlekettik qurylymdar tıisti taldaý-saraptaý jumystaryn júrgizýdi qolǵa almaq. Al altyn óndirisine qatysty máselege oraı qarajatty óńirdiń óz ishinen qarastyrý qajet.
Májilis sońynda Baqytjan Saǵyntaev tutastaı respýblıkada jáne óńirlerde sıfrlandyrý deńgeıin odan ári tereńdetý qajettigi týraly oı túıdi. Iаǵnı Úkimet basshysynyń tujyrymdaýynsha sıfrlandyrý tek óndiris salasyn ǵana emes, sonymen birge ekonomıka men áleýmettik ortanyń barlyq salalaryn qamtýǵa tıis. Sondaı-aq sapaly ónim óndirý arqyly básekelestikke tótep berýdiń de orny aıryqsha. «Memlekettik qoldaý sapaly eksporttyq ónimder shyǵarýdy ıgergen taýar óndirýshilerge ǵana jasalady» dep atap kórsetti Úkimet basshysy.
Aqtóbe oblysyna sapary kezinde B.Saǵyntaev óndiris, mádenıet, sport jáne densaýlyq saqtaý salasynda jańadan paıdalanýǵa berilgen nysandarmen tanysty.
Temir QUSAIYN,
«Egemen Qazaqstan»
AQTО́BE
