Bul marapatqa basqa elderden 100 shaqty nomınant úmitker bolǵan. Marapattaý rásimi tumandy Albıonda, Koroldik Dramalyq óner akademııasynda (RADA) ótti. Bıyl qazylar alqasy jergilikti qoǵamdastyqtarmen jumys isteý, qorshaǵan ortany qorǵaý, áleýmettik-ekonomıkalyq jáne ınnovasııalyq jobalar salalarynyń úzdikterin iriktedi. Al «Shelek fermerleri» áleýmettik jobasy atalǵan bedeldi marapatqa birinshi ret ıe bolyp otyr.
Dástúrli marapatty 1994 jyldan beri Ulybrıtanııanyń halyqaralyq kommersııalyq emes, The green organisation uıymy taǵaıyndap keledi. Bul báıge álemde iske asyrylatyn korporatıvtik áleýmettik jaýapkershilik salasyndaǵy jobalardy qamtıdy.
Al «Shelek fermerleri» jobasy 2013 jyldan bastap «Aýyldyq aımaqtardy damytý» keshendi baǵdarlamasy aıasynda Almaty oblysy «Eńbekshiqazaq aýdanynyń jergilikti qaýymdastyǵy» qoǵamdyq qory jáne Philip Morris Kazakhstan kompanııasynyń qoldaýymen júzege asyrylýda. Bul bastama agroónerkásip keshenin damytý, aýyl sharýashylyǵy ónimderiniń sapasy men básekege qabilettiligin arttyrý jáne óńirdiń aýyl turǵyndarynyń turmysyn jaqsartýdy kózdeıdi. Búginde oblystyń fermerleri shaǵyn bıznesti tabysty júrgizýge jáne kókónisterdi ósirýde zamanaýı tehnologııalardy qoldanýǵa múmkindigi bar. Osy maqsatta jergilikti qoǵamdastyqtar qory 2013 jyly ashylǵan Agrobıznes ortalyǵynyń bazasynda fermerler úshin trenıngter men semınarlar ótkizip, túrli keńes beredi. Buǵan qosa basqa oblystardan kelgen sharýalarmen kezdesýler ótkizedi. Osy is-sharalar barysynda tájirıbe almasýǵa jáne kókónisterdi ósirýge arnalǵan ozyq praktıkalar men ádisterdi ıgerýge bolady.
Jobanyń mańyzdy bóliginiń biri – fermerlerdi kókónis sharýashylyǵy negizderin jáne aýyl sharýashylyǵy ónimderin ósirýdiń jańa tehnologııalaryna oqytý. Trenıng arnaıy ashylǵan Agrobıznes ortalyǵy bazasynda ótedi. Oǵan Shelek fermerleri ǵana emes, Almaty oblysynyń ár aýdandarynan kelgen fermerler de qatysýda. Sondaı-aq joba sheńberinde aýyl sharýashylyǵyna jańa ınnovasııalyq ádister únemi engizilýde. Jergilikti qoǵamdastyqtar qory Qazaq ulttyq agrarlyq ýnıversıteti jáne AQSh-tyń Florıda ýnıversıtetiniń zertteý toby fermerlerge úzdik tájirıbelerdi engizýge jáne ónimdilikti arttyrýmen ónim sapasyn jaqsartýǵa kómektesedi. Osy ispetti sońǵy ınnovasııalardyń qatarynda jylyjaılarda ótimdi Shelek buryshyn ósirý bar. Bul ónimdi jınaý merzimin uzartýǵa múmkindik beredi.
2017 jyldan bastap oblystyń kishigirim sharýa qojalyqtary Almaty qalasynyń iri saýda jelilerine aýylsharýashylyq ónimderin birlesip ótkizý maqsatynda «Shelek fermerleri» áleýmettik kásipkerlik korporasııasyna birikti jáne resmı túrde tirkeldi. Onyń ishinde Arzan jáne Metro sýpermarketter jelisi bar.
Bıyl mamyr aıynda da Qazaqstannyń Eýropalyq bıznes-qaýymdastyǵy (EUROBAK) baıqaýynda «Shelek fermerleri» áleýmettik jobasy «Jyldyń úzdik seriktestik jobasy» atalymy boıynsha jeńimpaz atanǵan edi. Al ótken jyly «Shelek fermerleri» áleýmettik jobasy Qazaqstandaǵy amerıkalyq saýda palatasynyń basty marapatyna ıe bolǵan bolatyn.
Aınash ESALI,
«Egemen Qazaqstan»
ALMATY
