«Buqaralyq aqparat quraldarynda Qazaqstanda syrttaı oqý formasynyń joıylatyny týraly aqparat tarady. Osy ras pa? Eger ras bolsa, ekinshi joǵary bilimdi alý úshin jáne orta arnaýly bilimnen keıin qansha jyl oqý qajet? Qazir syrttaı oqý kúndizgi oqýǵa qaraǵanda birshama arzan. Syrttaı oqý joıylǵan soń, tólemaqy qansha bolady?» - dep jazdy Asyljan Baımaǵambetov.
Erlan Saǵadıev elde syrttaı oqý 2019 jyldyń 1 qańtarynan bastap toqtatylatynyn aıtty. Al syrttaı oqyp júrgen stýdentter oqýyn bitirgenshe jalǵastyra bermek.
Ol jańa zańnama boıynsha joǵary bilim baǵdarlamalaryn meńgerý merzimi alynyp tastalǵanyn jetkizdi.
«Soǵan sáıkes, joǵary oqý oryndary oqytý nátıjelerin eskere otyryp, bakalavrıat baǵdarlamasyn jyldamdatylǵan rejımde aıaqtaýdy kózdeıtin ıntegrasııalanǵan bilim baǵdarlamalaryn ázirleıdi», - deıdi mınıstr.
QR BǴM basshysynyń aıtýynsha, joǵary oqý oryndarynda aqyly oqýdyń baǵasyn retteıtin norma da alyp tastalǵan.
«Bul azamattardyń joǵary bilim alý múmkindikterin keńeıtýge baǵyttalǵan. Osyǵan baılanysty, bilim baǵdarlamalary boıynsha oqý tólemaqysynyń kólemi men bilim qyzmetterin kórsetý shartynyń formasyn endi joǵary oqý oryndary ózderi derbes bekitedi», - dedi ol.
