Uly Abaıdyń týǵan kúni tuńǵysh ret Tashkentte toılandy

Ádebıet • 14 Tamyz, 2018

Uly Abaıdyń týǵan kúni tuńǵysh ret Tashkentte toılandy

216 ret kórsetildi

Elbasy Nursultan Nazarbaev pen О́zbekstan Prezıdenti Shavkat Mırzıeevtiń ózara yntymaqtastyqty damytý jónindegi kelisimderi aıasynda baýyrlas ózbek jurty arnaıy qaýly qabyldap, 2018 jyldy «О́zbekstandaǵy Abaı jyly» dep jarııalaǵany belgili. Osy kelisim sheńberinde uly Abaıdyń týǵan kúni bıyl tuńǵysh ret Tashkent shaharynda keń kólemde atalyp ótti. Aıtýly sharaǵa Shyǵys Qazaqstan óńirinen oblys ákiminiń orynbasary Ásem Núsipova bastaǵan arnaıy delegasııa qatysyp qaıtty.

Egemen Qazaqstan

О́zbek eliniń astanasyndaǵy saltanatty shara Abaı kóshesindegi Abaı eskertkishiniń janynda, Qazaqstan elshiliginiń eńseli ǵımaraty aldynda bastalyp, oǵan elimizdiń О́zbekstandaǵy Tótenshe jáne ókiletti elshisi Erik О́tembaev, Qazaqstan Jazýshylar odaǵynyń tóraǵasy Ulyqbek Esdáýlet, О́zbekstan Respýblıkasynyń Ultaralyq qatynastar jónindegi komıtetiniń tóraǵasy Rýstam Kýrbanov sekildi qurmetti qonaqtar qatysty. «Bıyl naýryzda qabyldanǵan О́zbekstan Prezıdentiniń qaýlysynda Abaı shyǵarmashylyǵy Qazaqstanmen qatar, ózbek halqynyń da rýhanı damýyna zor yqpal etkeni atap kórsetilgen. Abaı eskertkishiniń aldynda aqynnyń týǵan kúni qarsańynda óleń oqý budan bylaı dástúrge aınalmaq», - dedi sharanyń ashylýynda sóz alǵan Erik О́tembaev.

Shyǵys Qazaqstannan arnaıy barǵan delegasııa Tashkentke qur kelmepti. О́zbekstan Jazýshylar odaǵynyń ǵımaratynda ótken konferensııada belgili ǵalym Arap Espenbetov «Abaı álemi» serııasymen basylyp jatqan 100 tomdyq toptamanyń alǵashqy bes kitabyn ózbekstandyq áriptesterine tartý etti. Semeı qalalyq tarıhı-ólketaný mýzeıi men oblystyq ámbebap kitaphana qyzmetkerleri ázirlegen kórmeni Tashkenttiń zııaly qaýymy qyzyǵa tamashalady.

Aqyn eskertkishi aldyndaǵy saltanatty sharada quttyqtaý sóz sóılegen oblys ákiminiń orynbasary Ásem Núsipova uly Abaıdy ulyqtap jatqan baýyrlas memleketke Shyǵys Qazaqstan halqynyń atynan alǵysyn jetkizdi.

«Tashkent tórindegi toıǵa uly Abaıdyń jerles urpaqtary retinde qatysý – biz úshin úlken abyroı. Aqynnyń murasy ózi týǵan óńirde de keńinen nasıhattalýda. Onyń shyǵarmasy búginde álemniń 28 tiline aýdaryldy. Qazaqstan Prezıdenti Nursultan Nazarbaevtyń bastamasymen qolǵa alynǵan «Rýhanı jańǵyrý» baǵdarlamasy da uly aqynnyń murasyn túgendeýge kóp septigin tıgizýde. Bıylǵy jazda ǵana 2000-nan astam mektep oqýshysy uly Abaı týǵan Jıdebaı óńirine saıahat jasap, Abaı álemimen tynystap qaıtty. Bul mazmundy saıahatqa О́zbekstan oqýshylaryn da shaqyramyz», - dedi Á.Núsipova.

Shara aıasynda Tashkenttegi qazaq jastary Abaı óleńderin qos tilde jatqa oqysa, semeılik dástúrli ánshi Berik Omarov hákimniń ánderin naqyshyna keltire shyrqap, kórermenniń kóńilin bir selpiltip tastady. Elshilik aldyndaǵy is-shara aqyn eskertkishine gúl shoqtaryn qoıýmen túıindelip, О́zbekstan Jazýshylar odaǵynyń ǵımaratyndaǵy konferensııamen jalǵasty.

Azamat QASYM,

«Egemen Qazaqstan»

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz