Jýyrda jambyldyqtar jan jadyratar jańalyqtyń kýási boldy. Qazaqstan Respýblıkasy Úkimetiniń 2018 jylǵy 9 tamyzdaǵy №485 Qaýlysymen Jambyl oblystyq fılarmonııasyna Kenen Ázirbaevtyń esimi berildi. Sonymen qatar, Taraz qalalyq mádenıet jáne tilderdi damytý bólimine qarasty «Qalalyq mádenıet úıi» memlekettik kommýnaldyq qazynalyq kásiporny Yqylas Dúkenuly jáne Taraz qalalyq bilim bólimine qarasty №10 orta mektep Saǵadat Nurmaǵambetov esimderin ıelendi.
Esimderi mekemelerge berilgen úsh tulǵanyń da qazaq tarıhyndaǵy oryny aıryqsha. Kenen Ázirbaev eki márte Lenın, Eńbek Qyzyl Tý ordenderimen marapattalǵan kórnekti aqyn, kompozıtor retinde belgili bolsa, Yqylas Dúkenuly qazaq kúı óneriniń qudiretin tanytqan tulǵa. Al Saǵadat Nurmaǵambetov elimizdiń alǵashqy Qorǵanys mınıstri bolyp, memlekettik deńgeıde qyzmet atqarǵan azamat.
Búgingi tańda Jambyl oblystyq qazaq drama teatryna ataý berý máselesi jıi kóteriledi. Kezinde atalǵan teatrǵa qazaqtyń tuńǵysh kásibı rejısseri Asqar Toqpanovtyń esimin berý kerektigi de aıtylǵan. Alaıda talaı jyldan beri bul másele sheshimin tappaı keledi. Endigi jerde Jambyl teatryna da laıyqty ataý beriledi degen úmit bar.
Hamıt Esaman,
«Egemen Qazaqstan»
Jambyl oblysy
