«Sıfrlyq Qazaqstan» baǵdarlamasyna sáıkes «Method PRO» jobasy qor tarapynan byltyr qolǵa alynǵan bolatyn. IT joba elimizdegi kompıýter baǵdarlamalaryn jasaýmen aınalysa bastaǵan daryndy jastar men olardyń ónimderin tutynatyn elimizdiń jáne sheteldiń iri kompanııalary arasynda ózara baılanys ornatýdy kózdeıdi. Joba aıasynda eń aldymen eki aılyq jazǵy kýrs uıymdastyrylady. Onda stýdentter IT jáne Non-IT sııaqty eki topqa bólinip otandyq jáne sheteldik tanymal mamandardan mobıldik jáne veb-ázirleý, mashınalyq bilim alý men Vig Data, marketıng jáne bıznes-taldaý, t.b. sııaqty 8 pán boıynsha teorııalyq jáne praktıkalyq sabaqtar alady. Ekinshi aıda taǵylymdamadan ótýshiler shaǵyn komandalarǵa bólinip, iri kompanııalar men uıymdardan arnaıy tapsyrystar alady. Sóıtip kýrsanttar óz jobalaryn ázirleıdi.
О́tken jyly tegin bilim alýǵa 8000-nan asa jas ótinish berip, olardyń 100-i ǵana taǵylymdamadan ótken edi. Olar ázirlegen 4 IT joba óndiriske engizilip, jastar 3 mıllıon teńgeden astam tabys taýyp qana qoımaı, iri ulttyq kompanııalarǵa jumysqa ornalasýǵa da múmkindik alǵan bolatyn. Al bıyl «Method PRO»-ǵa 200 daryndy maman qatysyp, «Qazposhta» AQ, «Qazatomónerkásip» AQ, «Qazaqstan ınjınırıng» AQ, Bas prokýratýra jáne sekildi elimizdegi iri kompanııalardyń tapsyrysymen 40 joba daıyndady. Onyń ishinde Bas prokýratýra úshin jasalǵan bet álpetin aıyryp tanýǵa arnalǵan ruqsattama júıesi; BTS Digital úshin sózdi aıyryp tanýǵa jáne túıindemeni taldaýǵa arnalǵan júıe; Rocket Study aǵylshyn mektepteriniń júıesine arnalǵan mashınalyq oqytý negizindegi usynys júıesi; «Atameken» UKP úshin joǵary oqý oryndarynyń reıtıngisine arnalǵan platforma jáne bızes-tizilim; K-Cell-ge arnalǵan jol trafıgin esepteý júıesi; Chocotravel&Aviata úshin tólemderdi onlaın salystyryp tekserý júıesi; Rahmet (ChocoFamily) úshin chekti ekige jáne odan da kóp adamǵa bólý; Technodom úshin analıtıkasy bar onlaın saýalnama; Technodom-ǵa arnalǵan vırtýaldyq asssıstent; Technodom-ǵa arnalǵan krossplatformalyq «Ekodom» oıyny; Glotus Limited Kazakhstan transporttyq kompanııasyna arnalǵan mobıldi qosymsha sııaqtylar úzdikter qatarynan oryn aldy.
Bas prokýratýranyń tapsyrysy boıynsha jasalǵan bet álpetin aıyryp tanýǵa arnalǵan ruqsattama júıesiniń avtory, Qaraǵandy qalasyndaǵy N.Nurmaqov atyndaǵy №2 daryndy balalarǵa arnalǵan oblystyq mamandandyrylǵan mektep-ınternatynyń robototehnıka páni oqytýshysy Múslim Ertýǵan «Method PRO» baǵdarlamasynyń jastardyń ózin-ózi damytýyna úlken serpilis berip otyrǵanyn aıtady. Onyń aıtýynsha bul kýrs jastardy tárbıelep otyrǵan muǵalimder úshin óte mańyzdy. О́ıtkeni ustazdar da jańa aqparat pen tehnologııalardan qalyspaı, onymen jumys isteı bilýi kerek.
«Biz ómirimizdi kúrt ózgerttik. Daryndy jastarmen tanystyq. IT ónimderin qalaı qurý jáne damytý, daıyn jobalardy bızneske ońtaılandyrýdy úırendik. Bizdiń top keremet jumys jasady», – deıdi IT taǵylymdamaǵa qatysqan Qasym Qazybek.
Bul joly taǵylymdamanyń nátıjesinde jobaǵa qatysýshylar 8 mıllıon teńgeden astam tabys tapqan. Sondaı-aq olarǵa iri otandyq kompanııalardan jumysqa ornalasý úshin 30 usynys kelip túsken.
Maıgúl SULTAN,
«Egemen Qazaqstan»
