Merekelik sharaǵa mınıstrden bastap Olımpıada chempıony, balýan Jaqsylyq Úshkempirov, ataqty aıaqdopshy Seıilda Baıshaqov, qyzdar arasyndaǵy erkin kúresten Olımpııa oıyndarynyń kúmis jáne qola júldegeri Gıýzel Manıýrova, bokstan Rıo Olımpıadasynyń kúmis júldegeri Vasılıı Levıt jáne taǵy basqa birqatar elimizge belgili sportshylar men sport ardagerleri qatysty.
Saltanatty shara barysynda vedomstvo basshysy elimizdiń sportyn damytýǵa úles qosyp júrgen 30-ǵa jýyq azamatty «Dene shynyqtyrý jáne sportty damytýǵa sińirgen eńbegi úshin», «Qurmetti sport qyzmetkeri» tósbelgisimen jáne Qurmet gramotasymen marapattady. Olardyń qatarynda «Bokstan Olımpıadalyq daıarlaý ortalyǵy» RMQK jasóspirimder qurama komandasynyń jattyqtyrýshysy Arkadıı Topaev, Sport rezervi jáne ádistemelik qamtamasyz etý basqarmasynyń bas sarapshysy Bahytjan Esjanov, «Kúres túrleri boıynsha Olımpıadalyq daıarlaý ortalyǵy» respýblıkalyq memlekettik qazynalyq kásipornynyń ádiskeri Abylaıhan Qylyshbaev bar.
«Sizderdi Sport kúni merekesimen quttyqtaımyn! Sport – eldiń mereıin asyryp, abyroıyn tasytatyn sala. Táýelsizdik jyldary el sportshylary halyqaralyq iri jarystarda top jaryp, kók baıraǵymyz asqaqtaı túsýde. Elbasymyz Nursultan Ábishuly Nazarbaev sportty damytýǵa, salamatty ómir saltyna aıryqsha mán beredi», dedi A.Muhamedıuly.
El namysy men memleket abyroıyn sheteldegi halyqaralyq arenalarda qorǵap júrgen sportshylar merekesi 2003 jyldyń 15 qarashasyndaǵy Elbasynyń Jarlyǵyna sáıkes jyl saıyn tamyz aıynyń úshinshi jeksenbisinde Sport kúni retinde atap ótiledi.
Álı BITО́RE,
«Egemen Qazaqstan»
