«Rýhanı jańǵyrý» baǵdarlamasy aıasynda ótken jyldyń qazan aıynda Shyǵys Qazaqstan oblysynda «Meniń mektebim» jobasynyń tusaýy kesilgen edi. Joba sheńberinde oblystaǵy 277 tolyq jınaqty mekteptiń 476 kabınetin hımııa, fızıka, bıologııa jáne robotty tehnıka synyptarymen Nazarbaev zııatkerlik mektepteriniń tájirıbesi negizinde zamanaýı qural-jabdyqtarmen jabdyqtaý josparlanǵan-dy. Erekshe atap óterligi, jas urpaqqa qajet jobany qarjylandyrýdy óńirdegi kásipkerler men iri kásiporyndar tolyqtaı óz moıyndaryna aldy.
Endi, mine, Alla sátin salsa, aımaqtaǵy 277 bilim ordasynyń oqýshylary 1 qyrkúıekten bastap zamanaýı qurylǵylarmen jaraqtalǵan jańa kabınetterde bilim alatyn bolady. Oblystyq bilim basqarmasynyń basshysy Saırangúl Jumadilovanyń aıtýynsha, elimizde balamasy joq biregeı aksııaǵa Shyǵystyń atymtaı jomart azamattary 2,8 mlrd teńge kóleminde qarjy aýdarypty. Onyń 2,3 mıllıard teńgesi 4 kabınetke qajet qurylǵylardy jáne 500 mıllıon teńgesi jıhazdardy satyp alýǵa jumsalypty. «476 kabınettiń 66-sy fızıka, 53-i hımııa, 85-i bıologııa, 272-si robotty tehnıka kabınetteri.
Elimizde «Sıfrly Qazaqstan» baǵdarlamasyn iske asyrýdyń Jol kartasy ázirlenip, barlyq mektepterdiń 30 paıyzyn robotty tehnıka kabınetterimen jabdyqtaý mindettelgen edi. Bizdiń oblys bul mejeni 42 paıyzǵa artyǵymen oryndap otyr. Joǵaryda aıtqan 277 mektepte ashylatyn kabınetterde sabaq beretin muǵalimderdiń barlyǵyn oqyttyq. Uzyn sany 600 adamǵa (323-i muǵalim, qalǵany – laboranttar) Máskeýden, Londonnan kelgen mamandar robotty tehnıka kabınetindegi qurylǵylarmen qalaı jumys isteý kerektigin, ıaǵnı praktıkalyq jaǵyn jaqsylap úıretti. Teorııalyq jaǵyn muǵalimderimiz «О́rleý» biliktilikti arttyrý ınstıtýty arqyly jańartylǵan bilim baǵdarlamasy aıasynda oqydy. Degenmen munymen shektelmeı, muǵalimderdi aldaǵy ýaqytta arnaıy kýrstarǵa jiberýdi josparlap otyrmyz», deıdi basqarma basshysy.
Osydan biraz ýaqyt buryn «Nur Otan» partııasy «Sıfrly Qazaqstan» baǵdarlamasy aıasynda balalarǵa arnalǵan 1 myń tegin IT-synyptaryn ashý jóninde usynys aıtqany belgili. Saırangúl Jumadilova Shyǵys Qazaqstan bul bastamany júzege asyrýǵa qazirdiń ózinde daıyn ekendigin aıtady. «Úkimet elimiz boıynsha 1 myńdaı IT-synyp ashýdy josparlaýda, al bizdiń oblys qazirdiń ózinde 277 synyp ashýǵa ázir. Semeı men О́skemendegi eki kolledjde IT-mamandaryn daıarlaıtyn ortalyq ashqan bolatynbyz. Semeıdegi resýrstyq ortalyqtyń daıyn baǵdarlamasy bar eken. Biz ony mektep baǵdarlamasyna beıimdedik. 306 saǵatqa josparlanǵan baǵdarlama 3-ten 10 synyp oqýshylaryna deıin arnalǵan. Bul baǵdarlamany Bilim jáne ǵylym mınıstrligine jiberip, kelisimderin aldyq. Qazir IT-synyptardy ashýǵa daıynbyz. Onda sabaq beretin muǵalimderdi oqytyp jatyrmyz. Ár mektepten eki muǵalimnen. Olar qoldaryna IT-maman degen kýálik alyp shyǵady. Oqýshylardy robotty tehnıka, baǵdarlamalaý, mehatronıka, vebdızaın jáne modeldeý sııaqty bes baǵytta oqytýdy josparlap otyrmyz. 3-4 synyptarǵa oıyn túrinde ótkizemiz. Ári qaraı kúrdelene beredi. Sonda bala mektep bitirgende óndiriste jumys isteýge daıyn bolady», deıdi S.Jumadilova.
Azamat QASYM,
«Egemen Qazaqstan»
Shyǵys Qazaqstan oblysy
