– Sizderdiń ınvestısııalaryńyz qaıta óńdeý isine alǵash ret tartylyp otyr. Bul Qazaqstannyń agrarlyq keshenine qosylǵan mańyzdy úles bolyp sanalady. Munda óndirilgen búkil ónim syrtqy naryqqa shyǵarylyp, elimizdiń eksport kólemin ulǵaıtýǵa, jańa jumys oryndaryn ashýǵa jáne tabys tabýǵa septigin tıgizedi. Osynyń bári óte mańyzdy, – dedi Qazaqstan Prezıdenti.
Kásiporyndy aralap kórgennen keıin oblys ákimi Qumar Aqsaqalov Soltústik Qazaqstan ólkesiniń bıylǵy birinshi jartyjyldyqtaǵy áleýmettik-ekonomıkalyq damý qorytyndylary jóninde baıandady.
Nursultan Nazarbaev Soltústik Qazaqstan oblysynyń elimizdegi topyraǵy eń qunarly ári aýyl sharýashylyǵyna qolaıly ekenine jáne agrarlyq salaǵa dástúrli túrde mamandanǵanyna toqtalyp, Qazaqstan astyǵynyń tórtten biri osy ólkege tıesili dep atap kórsetti.
Sonymen qatar, oblys ákimi Qazaqstan-Reseı XV óńiraralyq forýmyn ótkizýge daıyndyq barysy jóninde málimdedi.
Sońynda, Qazaqstan Prezıdenti aýyl sharýashylyǵyna ǵylymı jetistikter men sıfrlandyrýdy engizý, shekaralas óńirlermen yntymaqtastyqty jandandyrý, ónerkásip óndirisi men týrızm salasyn odan ári damytý, sondaı-aq óńirdiń ınvestısııalyq jáne iskerlik tartymdylyǵyn arttyrý arqyly aımaqtyń agrarlyq áleýetin keńeıtý jóninde birqatar tapsyrma berdi.
– Bes áleýmettik bastama osy máselelerdi sheshýge septigin tıgizý qajet. Onyń jergilikti deńgeıde sapaly júzege asyrylýyn qamtamasyz etý kerek, – dedi Nursultan Nazarbaev.
***
«Taıynsha Maı» JShS-i óńirdegi aýyl sharýashylyǵy klasterindegi eń iri kásiporyndardyń biri bolyp sanalady. Zaýyt Eýropada shyǵarylǵan zamanaýı qural-jabdyqtarmen jabdyqtalǵan jáne táýligine 1000 tonna shıkizat óndirýge múmkindigi bar. Kásiporynda 46 adam jumys isteıdi.
