Jańaqorǵan aýdanyndaǵy sharýa qojalyǵy basshylarymen kezdesý barysynda Senat depýtattary aýyl sharýashylyǵynyń tynys-tirshiligimen tanysyp, jaz aılarynda aǵyndy sýdyń kúrt azaıyp sý tapshylyǵyna dýshar bolatyndyǵy jaıynda, sonymen qatar janar-jaǵar maıdyń qymbattap egin sharýashylyǵyna qatty áser etetindigi jaıynda aýqymdy problemalyq suraqtarǵa kóńil bólip kóp pikirler almasty. Sharýa qojalyǵynyń basshylary úkimet keleshekte osy máselelerge kóp kóńil aýdaryp, aldyn-ala rettep, sheshimderin taýyp otyrsa degen usynys, tilekterin aıtty.
Senatorlar Shıeli aýdanynda «Arý-Ana» JShS basshylarymen kezdesti. Atalǵan sharýa qojalyǵy óndiretin túıe sútinen jasalatyn balmuzdaq halyq arasynda suranysqa ıe. Sharýany odan ári jandandyrý úshin mekeme basshylary úkimetten nesıe alý qıyn ekenin jáne nesıe paıyzdary tym joǵary bolatynyn atap ótip, nesıeni kásipkerler úshin qol jetimdi jáne qolaıly etip qarastyrýdy surady.
Sondaı-aq, Senat depýtattary Jalaǵash aýdanynda «Baıtabyn» JShS-de bolyp, aq marjan kúrish ósirip, baptap otyrǵan eńbekshi ujymmen júzdesti. Kúrishshiler halyq qalaýlylarymen emen-jarqyn suhbattasyp, sý tapshylyǵyn tilge tıek etti jáne sýdy únemdeı otyryp, 1 gektar alqaptan 70 sentner ónim jınaý múmkindikteri bar ekenderin jetkizdi.
Qazaly aýdanynda aýdandyq maslıhat depýtattarymen jáne de aýdan kásipkerlerimen kezdesip, aǵymdaǵy jyly 29-maýsym kúni qabyldanǵan «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» Zańdy tanystyryp, jan-jaqty túsindirdi. Sondaı-aq, senatorlar Qazaly aýdany, Aqtaban batyr aýyldyq okrýginiń belsendilerimen kezdesip, aýyldyń turmys-jaǵdaıymen tanysty jáne el ekonomıkasyn damytýdaǵy memleket tarapynan jasalyp jatqan baǵdarlamalar týraly turǵyndarmen oı-pikir almasty. Ashyq dıalog barysynda Senat depýtattary elimizde atqarylyp jatqan aýqymdy isterdiń nátıjeli júzege asyrylyp jatqandyǵy týraly jan-jaqty áńgimeledi jáne kezdesýge kelgen halyqtyń usynys-tilekteri qaperge alynatynyn jetkizdi.
Senatolar turǵyndardy elimizdi órkendetý jolynda jumyla jumys jasaýǵa shaqyrdy.
