Azııadaǵy ózara is-qımyl jáne senim sharalary jónindegi keńesin (AО́SShK) qurý ıdeıasyn Qazaqstan Prezıdenti Nursultan Nazarbaev tuńǵysh ret 1992 jyly 5 qazanda BUU Bas Assambleıasynyń 47-sessııasynda usynǵan bolatyn.
Uıym alǵashqy kezeńde 16 memlekettiń basyn qosty. Qazirgi ýaqytta atalǵan uıym 27 memleketti biriktirip otyr. Sondaı-aq taǵy jeti memleket pen tórt halyqaralyq uıym, onyń ishinde BUU Azııadaǵy ózara is-qımyl jáne senim sharalary jónindegi keńesine baqylaýshy retinde qatysady.
Atalǵan uıymǵa bizdiń elimiz 2002-2010 jyldar aralyǵynda tóraǵalyq etti. Qazir uıym tizgini Qytaı Halyq Respýblıkasynyń qolynda.
Uıymnyń hatshylyǵy 2006 jyly qurylyp, Astanada qonys tepti. Endi mine, Syrtqy ister mınıstri Qaırat Ábdirahmanov bastaǵan delegasııa hatshylyqtyń zamanaýı májilis zalyn resmı túrde ashty.
Konferens-zal sońǵy úlgidegi baılanys jáne beıne, dybys zoraıtqysh, mýltımedııalyq qurylǵylarmen jabdyqtalǵan. Álemdegi ozyq tehnologııalar qoldanylyp, osynda ótetin kezdesý-jıyndardy taspaǵa basý barynsha jeńildetilgen.
Syrtqy ister mınıstri sıfrlandyrý men avtomattandyrýdyń ozyq úlgilerin kórip, mundaı jabdyqtardyń Astanadaǵy keńselerde kezdese bermeıtindigin atap ótti. Qural-jabdyqtar uıymnyń qazirgi tóraǵasy – Qytaı Halyq Respýblıkasy tarapynan qarjylandyrylǵan.
Delegasııa quramyndaǵy elshilikterdiń ókilderi de Azııadaǵy ózara is-qımyl jáne senim sharalary jónindegi keńesiniń májilis zalynyń ashylýymen quttyqtap, jańa tehnologııalardyń jumys sapasyn jetildire túsýge septigin tıgizerine senim bildirdi.
Serik ÁBDIBEK,
«Egemen Qazaqstan»
