О́ńir turǵyndary úshin mańyzy zor nysandy 1997 jyly «Qazsınk» kompanııasy 25 jylǵa jalǵa alǵan bolatyn. «1997 jyldan beri mundaǵy negizgi qondyrǵylardyń barlyǵy jańartyldy. Ol úshin naqty jospar qurdyq. Investısııalyq baǵdarlamamyz ár bes jyl saıyn jańaryp otyrdy. Mine, sonyń nátıjesinde stansadaǵy transformatorlardyń barlyǵy aýystyryldy. Sońǵy 15 jyldyń ishinde birde-bir ret tótenshe jaǵdaı oryn alǵan joq desek te bolady», - deıdi "Qazsınk" JShS Buqtyrma SES kesheniniń dırektory Sergeı Koblov.
О́tken ǵasyrdyń 50 jyldary Buqtyrma bógenin salý kezinde Keńester Odaǵynda alǵash ret qatty beton paıdalanylǵan eken. Sodan beri jarty ǵasyrdan astam ýaqyt ótse de táýelsiz sarapshylar betonnyń beriktigi artyp kele jatqanyn rastaǵan kórinedi. Buqtyrma 2012 jyly álemdegi eń berik bógen bolyp tanylypty. Dese de SES jumysshylary arqany keńge salǵan emes. Nysanda memlekettik jáne táýelsiz tekserýler turaqty túrde júrgizilip, qaýipsizdik sharalary qatań baqylaýǵa alynǵan.
Mamandar stansadaǵy sý agregattary energetıkalyq tıimdiligi joǵary dóńgelekterge aýystyrylǵandyqtan elektr qýatyn óndirýge ketetin sýdyń kólemi azaıǵanyn, bul stansanyń qýattylyǵyn arttyra túskenin aıtady. «Qazir munda ózdiginen jumys atqaratyn aspaptardyń jıyntyǵy ornatyldy. Sonyń arqasynda Astanadaǵy ortalyqta otyryp-aq, mundaǵy jumysty basqarýǵa bolady. Qyzmetkerler telefon apparaty arqyly da generatordyń kez kelgen qyzmetin toqtatyp nemese qaıta qosa alady», - deıdi S.Koblov.
Azamat QASYM,
«Egemen Qazaqstan»
Shyǵys Qazaqstan oblysy
