Keshe Qazaqstan Respýblıkasy Parlamenti Senatynyń Tóraǵasy Qaırat Mámı Sankt-Peterbýrg qalasyndaǵy Tavrııa saraıynda ótken EýrAzEQ Parlamentaralyq Assambleıasynyń on úshinshi otyrysyna qatysyp, onda EýrAzEQ PAA-nyń tóraǵalyǵyna saılandy.
Parlamentarııler aldynda sóılegen sózinde Qaırat Mámı yqpaldasýdyń jańa mindetterin júzege asyrý maqsatynda ony zańnamalyq turǵydan qamtamasyz etý máselesine nazar aýdarý qajettigine toqtaldy. «Qazirgi ýaqytta Qazaqstan, Belarýs, Reseı arasyndaǵy Keden odaǵy tabysty jumys istep tur. 2012 jyldyń 1 qańtarynan bastap Birtutas ekonomıkalyq keńistik, al 2015 jyldan Eýrazııalyq ekonomıkalyq odaq jumys isteı bastaıdy», – degen Q. Mámı osy rette qaı eldiń de ulttyq zańnamalaryn úılestirýdiń jáne Eýrazııalyq odaqtyń quqyqtyq negizin qalyptastyrýdyń mańyzdylyǵyn qaperge saldy. Ári qaraı Tóraǵa: «Bizdiń jumysymyz bir-birimizge degen syılastyq pen ózara túsinistik aıasynda, teń quqyqtylyq pen tepe-teńdik qaǵıdatyn saqtaı otyryp júrgizilýi tıis», – dedi.
Otyrysta Eýrazııalyq ekonomıkalyq qoǵamdastyq Sotynyń sýdıalary taǵaıyndaldy. Aldaǵy jyldyń 1 qańtarynan bastap jumysyn bastaıtyn jańa sot organyna Qazaqstan tarapynan Musabek Álimbekov pen Jolymbet Báıishev baratyn boldy.
Senat tóraǵasy EýrAzEQ PAA otyrysyna kelgen osy saparynda TMD-ǵa qatysýshy memleketterdiń Parlamentaralyq assambleıalary Keńesiniń Bas hatshysy Mıhaıl Krotovpen kezdesti. Onyń barysynda Q.Mámı Reseı Federasııasy Federaldy Jınalysy Memlekettik Dýmasyna depýtattar saılaýyna monıtorıng júrgizýdegi TMD PAA baıqaýshylar mıssııasynyń jemisti jumysyn atap ótip, endi osy mıssııanyń aldaǵy jyldyń qańtar aıynda bizdiń elimizde bolatyn Parlament Májilisi depýtattarynyń saılaýynda baıqaýshylyq qyzmetke belsendi qatysatynyna senim bildirdi. «Assambleıanyń tájirıbesi jáne Dostastyq elderindegi osyndaı sharalarǵa Hatshylyqtyń qatysýy Parlament Májilisi saılaýyna uıymdasqan túrdegi monıtorıng júrgizýge járdemdesetin bolady», – degen Tóraǵa Qazaqstandaǵy aldaǵy saılaý ashyq, erkin jáne ádiletti bolatynyna senimdi ekenin bildirdi.
Kezdesý barysynda Mıhaıl Krotov TMD PAA Keńesiniń Tóraıymy Valentına Matvıenkonyń qoldaýymen Assambleıa keńesiniń mereıtoılyq otyrysyn bizdiń elimizde ótkizý josparlanyp otyrǵanyn jetkizdi. «Assambleıanyń qurylǵan jerin eskere otyryp, forýmdy Qazaqstanda ótkizýdiń erekshe máni bar», – dedi Bas hatshy M Krotov. Sonymen, TMD-lyq parlamentarııler mereıtoılyq otyrysqa katysý úshin aldaǵy 2012 jyldyń naýryz aıynda elimizge keletin bolady.
Elimizdiń zań shyǵarý organynyń joǵarǵy palatasynyń Tóraǵasy Qaırat Mámı suhbat kezinde Dostastyqqa múshe memleketterdiń qatynastaryn odan ári nyǵaıtý máselelerinde parlamentaralyq baılanystardyń róline erekshe mán bere sóıledi. Jáne de Tóraǵa osy rette taǵy bir máselege nazar aýdardy. Ol – TMD elderindegi parlamentshilerdiń halyqaralyq birlestikter aıasynda ózara belsendi is-qımyl tanytýlary qajettigi. «Biz parlamenttik uıymdardaǵy komıssııa quramdarynyń múmkindigin tolyq dárejede paıdalanýǵa tıispiz», – dep atap ótti osy oraıda Tóraǵa.
«Tavrııa» saraıynda sondaı-aq EýrAzEQ PAA-nyń Turaqty komıssııalarynyń birlesken otyrystary boldy. Olardyń kún tártibine birneshe másele qoıyldy. Onda quqyqtyq, kedendik úılestirý men shekaralyq saıasat, saýda jáne halyqaralyq yqpaldastyq, agroónerkásiptik saıasat, tabıǵatty paıdalaný, ekologııa syndy qadaý-qadaý, qaı eldiń de damýyna áser etetin, aqyldasa otyryp, keńesetin, oılardy ortaǵa salatyn máslıhattar ótti.
Al mundaǵy aıtylǵan oılar men jalpy sapar barysynan jazylǵan materıaldy aldaǵy nómirlerdiń birinen oqıtyn bolasyzdar.
Anar TО́LEÝHANQYZY, «Egemen Qazaqstan» – Sankt-Peterbýrgten.
