Basqosýǵa Qoǵamdyq damý mınıstri D.Káletaev, Parlament depýtattary, Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri, memlekettik organdar ókilderi, belgili qoǵam qaıratkerleri jáne ǵylymı uıymdar basshylary qatysty.
Is-sharany ashqan G.Ábdiqalyqova Elbasy N.Á.Nazarbaevtyń «Otbasy – eń úlken baqyt, jaqsylyq ataýlynyń bári sodan bastaý alady» degen sózine toqtaldy.
Búginde memlekettik otbasy saıasaty Qazaqstandaǵy áleýmettik salanyń negizgi basymdyqtarynyń biri bolyp sanalady. Elbasy 2016 jyly Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasyn bekitti. Onda uzaq merzimdik maqsattar men mindetter, sondaı-aq otbasylyq-genderlik salany damytýdyń baǵyttary aıqyndalǵan.
Otbasy ınstıtýtyn qoldaý úshin Qazaqstanda júrgizilip jatqan áleýmettik saıasattyń mańyzdy quramdas bóliginiń biri – áıelderge jáne balalary bar otbasylarǵa áleýmettik kómek kórsetý júıesi. Olar ataýly kómektiń tutas júıesimen qamtamasyz etilgen. Atap aıtqanda, 2003 jyldan beri bala týǵanda beriletin bir rettik járdemaqy engizildi, 2006 jyldan bastap barlyq qazaqstandyq otbasylarǵa bir jasqa deıingi bala kútimi úshin járdemaqy tólenedi. Balalary bar otbasylardy qoldaýǵa baǵyttalǵan sharalardy bıýdjetten qarjylandyrý 2007 jyldan beri 5 ese ósti.
Memlekettik hatshy ornyqty damý maqsattarynyń biri zorlyq-zombylyqtyń barlyq túriniń taralýyn aıtarlyqtaı azaıtý ekenin atap ótti.
– Biz memlekettik organdarmen jáne úkimettik emes uıymdarmen birlese otyryp, bul keleńsizdikti boldyrmaý úshin aldyn alý jumystaryn júrgizip kelemiz, – dedi G.Ábdiqalyqova.
Elde úkimettik emes uıymdardyń qatysýymen turmystyq sıpattaǵy zorlyq-zombylyq máselelerin sheshý jónindegi 31 daǵdarys ortalyǵy jumys isteıdi. Túrkistan oblysynda «Otbasyndaǵy zorlyq-zombylyqsyz Qazaqstan» pılottyq jobasy júzege asyrylýda.
Jıyn sońynda Memlekettik hatshy Qoǵamdyq damý mınıstrligine otbasy saıasaty boıynsha júıeli jumysty jolǵa qoıýdy, memlekettik organdar men azamattyq qoǵam jumysyn úılestirýdi tapsyrdy.
