Bilim Foundation qory Astana qalasy ákimdigimen birge IýNISEF jáne QR Densaýlyq mınıstrliginiń Respýblıkalyq psıhıkalyq densaýlyq ǵylymı-a ortalyǵymen áriptestik negizde Astana qalasynda «Jasóspirimderdiń densaýlyq pen ómirlik daǵdylaryn qalyptastyrý jáne kámeletke tolmaǵandar arasynda sýısıdtiń aldyn alý» baǵdarlamasyn endirýdi qolǵa aldy.
Qazaqstanda sýısıdtiń jáne sýısıdke talpyný áreketteriniń tereńde jatqan sebepterin anyqtaǵan zertteýlerge súıensek, 90% jaǵdaıda jasóspirimder arasynda sýısıd psıhıkalyq densaýlyqtyń nasharlaýymen tikeleı baılanysty. Jasóspirimdik kezeńnen eresek ómirge aıaq basar kezinde adam boıyndaǵy psıhologııalyq stress keı jaǵdaıda sýısıdke ıtermeleıdi. Degenmen jastar arasynda psıhıkalyq densaýlyqtyń aqaýlaryn jasóspirimdik kezeńde anyqtaý qıyndyqtar týǵyzady.
Bilim Foundation qorynyń jetekshisi Erlan Aıtmuhambetovtiń aıtýynsha, iske asyrylatyn jańa baǵdarlama ómirdiń túrli qıyn syndaryna tap bolyp, kúızelis pen toryǵýda júrgen Astanadaǵy mektep pen kolledjderde oqıtyn jasóspirimderdi anyqtap, olarǵa der kezinde eresekter tarapynan kómektesýge jaǵdaı jasaıdy. Sondaı–aq sýısıdtiń aldyn alý maqsatynda jasóspirimderdiń ómirlik daǵdylaryn damytýdy kózdeıtin keshendi is-sharalar júrgiziledi.
Dóńgelek ústel barysynda Astana qalasynda ornalasqan densaýlyq saqtaý mekemeleriniń basshylary Qazaqstannyń alty aımaǵynda óz tıimdiligin kórsetken baǵdarlamany Astanada nátıjeli iske asyrý joldaryn talqylady. Osy jyldyń aıaǵyna qaraı Astanadaǵy emhanalar kámeletke tolmaǵandarǵa psıhıkalyq densaýlyqty jaqsartýdy kózdeıtin kómek kórsete bastaıdy.
Aıta ketý kerek, Bilim Foundation qorynyń atalǵan baǵdarlamasy aıasynda búginde elimizde 558 psıholog, 275 dáriger jáne 13692 oqytýshy arnaıy ázirlengen oqý kýrstaryn támamdady.
