Elbasy bastamasynda naqtylanǵan baǵyttyń biri – qosymsha bilim granttaryn bólý men stýdentterdi jataqhanamen qamtý jaıy bolatyn. Jetisýlyq jastardyń keń qoldaýyna ıe bolyp, ata-analardyń rızashylyǵyna bólengen bastama boıynsha qazir naqty sharalar qolǵa alyndy. Jospar boıynsha oblysta stýdentterge arnalǵan 10 jataqhana salý kózdelgen. Qazir qurylys júrgizýge qajetti jer telimi bólinip, jobalaý jumystary bastalyp ta ketti.
– Bes bastamanyń ishindegi eń ózektisi memlekettik granttardyń sanyn arttyrý jáne bilimgerlerdi jataqhanamen qamtý máselesi ekeni anyq. Elbasynyń sheshimimen 2018-2019 jyldary bólinetin qosymsha granttar bilim salasyna eleýli serpin beretini anyq. Oqý oqyp, izdenemin degen jastardy qoldaý, bilimge, jataqhanaǵa degen qoljetimdilik boıynsha jarııa etilgen jaqsy jańalyq – jalpyǵa ortaq jaǵymdy is. Buǵan deıin elimiz boıynsha memleket tarapynan joǵary oqý oryndaryna 54 myń grant bólinip kelgen. Endigi kezekte Elbasy bastamasymen atalmysh tegin oqý júıesi 20 myń grantpen tolyqty, – deıdi Taldyqorǵan zań kolledjiniń dırektory Myqtybek Rahymbekov.
Bastama aıasynda jataqhanamen qamtý úlesin arttyrý da stýdentterdiń kóńiline senim uıalatty. О́ıtkeni elimizdiń barlyq óńirinde stýdenttik baspana jaıy syn kótermeıdi. Bul jaǵynan jetisýlyq jastar da qıyndyqqa tap bolyp otyrǵany jasyryn emes. Oblystaǵy biregeı oqý orny – Ilııas Jansúgirov atyndaǵy Jetisý memlekettik ýnıversıtetiniń ózinde de jataqhana jetispeýshiligi bar. Ýnıversıtettiń eki jataqhanasy 500 stýdentke ǵana laıyqtalǵan. Al myńnan astam jas qaladan páter jaldap nemese týys-týǵanynyń úıin saǵalaýǵa májbúr. Endi «Prezıdenttiń bes áleýmettik bastamasy» negizinde jasalǵan jol kartasy boıynsha taǵy da 500 oryndyq jataqhana qurylysy bastalmaqshy. Dál osyndaı jataqhana tapshylyǵy aımaqtaǵy Súleımen Demırel ýnıversıtetinde de sezilip otyr. Jospar boıynsha bul oqý orny aýmaǵyna 1000 oryndyq stýdentter úıi salynbaq. Buıyrsa, qurylys jumystary 2024 jyly tolyq aıaqtalady. Munan bólek, oblystaǵy 8 kolledjge jańadan jataqhana salýǵa jer telimi qarastyrylyp otyr. Ǵımarattyń jobalyq-smetalyq qujattaryn retteýge 16 mln teńge bólingen.
Sondaı-aq bıyldan bastap memlekettik grant úlesiniń artýy da jastardyń bilim alýǵa degen qushtarlyǵyn ushtap, senimin nyqtady. Máselen, esep boıynsha Almaty oblysynda 17 myń ul-qyz mektep bitirse, UBT synaǵynan súrinbeı ótken 5198 jas grant ıelenip, joǵary oqý ornyna túsken eken. Bul kórsetkish ótken jylǵymen salystyrǵanda 1334 adamǵa kóbeıgen. Demek, Elbasy bastamasy boıynsha grant sanynyń kóbeıgeni aımaqtardaǵy bilim alýǵa yntaly jastardyń jolyn ashqany anyq.
Al Almaty oblysy óńirdegi kadrlarǵa degen qajettilikti eskere otyryp, UBT qorytyndysy boıynsha joǵary balǵa ıe bolǵan 100 talapkerge byltyr da bilim berý granttaryn bólgen bolatyn. Ol boıynsha pedagogıkalyq, aýyl sharýashylyǵy jáne medısınalyq mamandyqtarǵa basymdyq berilgen edi. Bıyl bul úrdis taǵy jalǵasyn taýyp, oblys ákimi tarapynan oǵan qosymsha taǵy 100 grant bólindi. Iаǵnı 2018-2019 oqý jylynda bul maqsatqa jergilikti bıýdjetten qosymsha 47,5 mln teńge qarastyrylyp otyr.
– Qazir jergilikti bıýdjet esebinen 438 stýdent ákim grantyna oqyp jatyr. Olardyń seksen toǵyzy medısına, eki júz jıyrma jetisi pedagogıka, jıyrma úshi aýyl sharýashylyǵy, jıyrma biri mádenıet salasyndaǵy mamandyqtarǵa bólinse, basqa da mamandyqtar boıynsha taǵy 78 stýdent tegin bilim alýda, – deıdi bul jaıynda oblys ákiminiń orynbasary Aıdarbek Baıjanov.
Qalmahanbet MUQAMETQALI,
«Egemen Qazaqstan»
Almaty oblysy
