Osy oraıda Shymkent qalasynyń №89 mektep-lıseıi oqýshylardyń tanymdyq qabiletin damytý, bilim sapasyn arttyrýmen qatar aqyl-oı shyǵarmashylyq belsendilikterin jetildirý, jeke pánderdi oqytýdyń tıimdi ádis-tásilderin izdestirýde ilki qadamdarǵa baı bilim ordasy deýge bolady.
Elbasy ár Joldaýynda zaman talabyna saı bilim berý qoǵam músheleriniń adamgershilik, ıntellektýaldyq, mádenı damýynyń joǵary deńgeıin jáne kásibı biliktiligin qamtamasyz etýge baǵyttalǵan tárbıe berý men oqytýdyń úzdiksiz úrdisi ekendigin aıtyp keledi. Atalǵan lıseı shákirtterdiń ishki áleýeti men syrtqy mádenıetin úılestirýde josparly jumys júrgizýde. Búginde tárbıe men tájirıbeni ushtastyryp kele jatqan lıseıdiń jemisti jetistikteriniń birqatary aıta keterlik mánge ıe.
Aldymen, muǵalim sheberliginiń negizgi kórsetkishi – metodıka salasyndaǵy ǵylymı jańalyqtar men aldyńǵy qatarly ozyq tájirıbeni jetik ıgerý. Árıne izdenis nátıjesinde júzege asatyn tıimdi oqytý ádisi oqýshylardyń ǵylymı negizde yntasyn arttyrýǵa múmkindik beredi. Bul rette №89 mektep-lıseıi matematıka jáne jaratylystaný pánderi boıynsha elektıv, úıirme saǵattaryn uıymdastyryp, oqýshylardy ǵylymǵa baýlý jolǵa qoıylǵan. Eń bastysy, jańa oqý jylynyń alǵashqy aptasynda ár aıda ótetin ınteraktıvti sabaqtar kestesi jasalyp, barlyq birlestik muǵalimderi bekitilgen keste boıynsha flıpchartpen sabaq ótedi. Muǵalimder onlaın ádis-tásilderdi Plikers, Kahoot, Bilim land tapsyrmalary arqyly oqytý, jańa sabaqtardy Tarsia, Smart beıdj, sematıkalyq karta kómegin qoldana otyryp dáris ótkizýdiń oqýshyǵa ońtaıly ekendigin aıtady. Interaktıvti sabaqtarmen 1-11 synyp oqýshylary tolyq qamtylyp, úzdik sabaqtardy jınaq qylyp shyǵarý ustazdardyń sapaly jumys isteýine jol ashady. Sapaly sabaqtar óz kezeginde nanymdy nátıjelermen lıseı atyn respýblıka kólemine tanytyp otyr. Qazirge deıin mektep-lıseı boıynsha 450 oqýshy ǵylymı jumyspen aınalyssa, onyń 95-i úsh tilde qorǵalǵan. Bul jerde oqýshylarǵa ǵylymı jetekshilik jasaǵan mektep ustazdarynyń «Ekologııalyq ortalyq» mamandary, sondaı-aq altaýy ǵylym kandıdaty ekenin aıta ketkenimiz jón.
Sonymen qatar biregeı bilim oshaǵy oqýshylar men ustazdardyń bilim-biliginen bólek, qoǵamdyq jumystardy júzege asyrady. Aıtalyq, byltyr Shymkent qalasyn gúldendirý maqsatynda qalalyq ákimdik, meshit, qarttar úıi, mektep pen balabaqsha sııaqty mańyzdy nysandardyń aldyna 25 myń dana gúl kóshetterin otyrǵyzýdy qolǵa alǵan. Bıylǵy oqý jylynda da Shyraıgúldiń 11 myń, 2 myń Tagıs, Kanna gúliniń 2 myń danasyn, sondaı-aq jarqyraýyq Salvııanyń 500 danasyn qalany abattandyrý úshin tartý etti. Munyń bári qyrýar eńbekpen júzege asqan jumys ekeni aıtpasa da belgili.
Eń bastysy, atalǵan kóshetter bıologııa páni boıynsha memlekettik jalpyǵa mindetti bilim berý standarty negizinde lıseı mekemesiniń aýlasyndaǵy oqý tájirıbe alańynda ósirilgen. Alań jumysy 2012 jyldan beri jolǵa qoıylǵan. Demeýshiler kómegimen qurylǵan 300 sharshy metr jylyjaıda «Terek aǵashyn vegatıvti kóbeıtý joldaryn zertteý», «Raýshan gúlin vegatıvti jolmen kóbeıtý», «Shyraıgúldi ósirip, baptaý», «Bıogýmýs daıyndaý», «Telý jáne ulastyrý», «Emdik qasıeti bar ósimdikterdi zertteý», «Tuqymnan jemis aǵashtaryn kóbeıtý» jumystaryn da №89 mektep-lıseı oqýshylary qoldaryna alǵan. Onda úıirmege qatysqan oqýshylar baqylaý, zertteý jumystaryn júrgizip, teorııany praktıkamen, ǵylymmen ushtastyrady. Atalǵan tájirıbe alańy oqýshylar boıynda bilim men ekologııalyq quzyrettilik qalyptastyra otyryp, Shymqalany gúl qalaǵa aınaldyrýda áli de kóptegen jumystar atqarmaq.
Memlekettiń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» baǵdarlamasy men mektep oqýshylarynyń fýnksıonaldyq saýattylyǵyn damytý jónindegi 2012-2016 jyldarǵa arnalǵan ulttyq is-qımyl jospary atalǵan mektep-lıseıde ońtaıly sheshimin tapty.
Bilikti basshy Qasymbaı О́mirbekuly basqaratyn lıseı oqýshylary joǵarydaǵy jemisti jumystardyń nátıjesinde halyqaralyq, respýblıkalyq, oblystyq, qalalyq túrli baıqaýlarda únemi jeńimpaz atanyp jatady. «Bizdiń balalarymyz ben nemerelerimiz babalarynyń ıgi dástúrin saqtaı otyryp, qazirgi zamanǵy naryqtyq ekonomıka jaǵdaıynda jumys isteýge daıar bolýy kerek. Olar beıbit, jyldam órkendeý ústindegi álemge áıgili ári syıly óz eliniń patrıottary bolady. Sondyqtan adamnyń jan-dúnıesin rýhanı baıytatyn qasıetti baǵalatýda árqashan jańashyldyqty tarıhpen, tabıǵatpen ushtastyrýdy maqsat etemiz», deıdi mektep dırektory Q.Atabaev.
Shynymen de jańa adamdy tek jańashyl ustaz ǵana tárbıeleı alady. О́nerli adamnyń talabyn ónegeli ustaz ushtaýy kerek. Sonda ǵana jastar bolashaǵynyń shoqtyǵy bıik bolmaq.
Farıda BAIYRBEKOVA,
№89 mektep-lıseıdiń qazaq tili men ádebıeti pániniń muǵalimi
ShYMKENT
