– Jyl basynda depýtattar, qoǵamdyq keńes músheleri jáne óńirlik bıznes-qaýymdastyq ókilderiniń bastamasymen oblysta «Jappaı kásipkerlikti damytý» jyly jarııalandy, – dedi ol. – Jaqynda qolyma óńirlerdegi kásipkerlik salasynyń damý barysy týraly statıstıka tústi. Jeti aıdyń qorytyndysy boıynsha Qyzylorda oblysy respýblıka kóleminde birinshi orynda keledi eken. Jumys isteıtin shaǵyn jáne orta kásipkerlik sýbektileriniń sany oblysymyzda 10,8 prosentke artqan. Iаǵnı respýblıkalyq ortasha deńgeıden 2,4 esege artyq. О́tken jyly ǵana oblysymyz 16 óńirdiń ishinde 10-shy orynǵa turaqtaǵan. Degenmen, jetistikke toqmeıilsýge bolmaıdy. Alda atqarar jumys jetkilikti. «Jappaı kásipkerlikti damytý» bastamasynyń úsh jylǵa uzartylǵandyǵyn eskersek, oblysta jumyssyz azamattardyń qatary azaıyp, kásippen aınalysýshylar eselenedi degen senimdemin.
Jumys júıeli qoıylǵan jerde tabys bolady. Oblys basshysy Qyrymbek Kósherbaevtyń bastamasymen jyl basynda ózin-ózi jumyspen qamtyǵandarmen qatar múlde jumyssyz adamdardyń esebi alynǵan. Az emes, 100 myńǵa jýyq azamat eki qolǵa kúrek tappaı, qolyna ilingenin kásip qylyp kún kórip júr. Osynsha azamattyń erteńin oılaǵan oblys basshylyǵy keshendi jospar jasap, kásipkerlikti óristetýge sheshim qabyldady. Nátıjesiz emes. Osy maqsatqa 32 mlrd teńge qarastyrylǵan edi. Qyzylorda óńirlik ınvestısııalyq ortalyǵynyń ózi ǵana 280 jobany qarjylandyrady.
Aýyldaǵy aǵaıynnyń kásip ashýyna jaǵdaı jasalyp, jeńildetilgen nesıeniń basym bóligi aýyl azamattaryna berilýde. Máselen, bıyl «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda 1,8 mlrd teńge aýyldy eldi meken jobalaryn qarjylandyrýǵa bólinse, 89,5 mln teńge qalalyq jańa kásipkerlerdiń jobasyna bólingen.
Nemis halqynda «qarny ashqanǵa balyq berme, qarmaq ber» degen qanatty sóz bar eken. Bir rettik kómek eshqandaı az qamtylǵan otbasynyń qabyrǵasyn jappaıdy. Al jeńildetilgen nesıe men kásipkerlikke oqytý isi osylaısha jemisin berýde.
Baqtııar TAIJAN,
«Egemen Qazaqstan»
Qyzylorda oblysy
