Shara bastalmas buryn velosıpedke mingen ata-analar men balalar fıtnes jattyqtyrýshylardyń jetekshiligimen azdap jattyǵý jasady.
Jalpy, bıylǵy dýatlonda balalar úshin úsh sanat – 8-9, 10-11 jáne 12-13 jas belgilendi. Otbasylyq saıystyń alǵashqy bóliminde jalpy uzyndyǵy 4,5 shaqyrym qashyqtyqqa – aldymen 2,1 qashyqtyqqa ákeler júgirdi, odan ári estafetany velosıpedke mingen analar aldy. Jarysty balalar márege deıin 300 metr júgirýmen aıaqtady.
– «Otbasylyq dýatlon» dástúrge aınaldy. Bıyl úshinshi ret ótkizip otyrmyz. Jarysqa qatysýǵa nıet bildirgen otbasylar edáýir artty. Byltyr 30 otbasy bolǵan, bıyl 8-9 jas sanaty qosyldy. Keler jyly 5-6 jastaǵy balalardy qospaqshymyz. Jarysqa qatysýǵa ótinimder aldyn ala elektrondy túrde qabyldandy, mindetti túrde shlem men dárigerdiń ruqsaty bolýy kerek, – deıdi Astana qalasynyń sporttyq-buqaralyq is-sharalar ótkizý dıreksııasynyń basshysy Azamat Imashev.
Saıys sońy marapatqa ulasyp, júldeli úsh orynnyń ıegerlerine turmystyq tehnıkalar, al balalarǵa jańa velosıpedter tabystaldy. Uıymdastyrýshylar árbir qatysýshyǵa estelik retinde arnaıy medaldar berdi.
8-9 jas sanatynda 2 shaqyrym qashyqtyqta Erjan Qanaev birinshi bolyp keldi, al onyń balasy Áltaıyr márege tórtinshi bolyp jetti.
– Bul jarysqa ekinshi ret qatysyp otyrmyz. Osyndaı otbasylyq mereke úshin uıymdastyrýshylarǵa alǵys aıtamyz. Árıne, mundaı sharalar elordada keńinen ótkiziledi. Bıyl qatysýshylar muqııat daıyndalǵan sııaqty. Jarys bastalǵansha bárimen tanysyp úlgerdik. Bireýler jeńil atletıkamen, basqalary kúrespen, shańǵy jarysymen aınalysady eken. Sportpen shuǵyldanatyn elordalyqtar kóbeıe túsken, – deıdi Erjan.
Jarys qorytyndysy boıynsha 8-9 jastaǵy balalar arasynda Vıshnıakovtar márege birinshi bolyp keldi, Zaısevter otbasy ekinshi, Belıshkınder úshinshi orynǵa taban tiredi. Ekinshi jarysta Djengız áýleti kósh bastady. Byltyr da olardyń 10-11 jas sanatynda birinshi bolǵandaryn aıta ketkenimiz jón. Otaǵasy Ýfýký 50-den asqan jasyna qaramastan áli de tyń ekenin jarysta taǵy bir dálededi. «Jubaıym ekeýimiz sportshymyz. Ol dzıýdomen, men 35 jyl boıy erkin kúrespen aınalysamyn. Onyń ústine marafondarǵa qatystym. Búgingi jarys jaqsy ótti. Naǵyz otbasylyq shara. Jastarǵa egde jasyma qaramastan sportpen aınalysýǵa bolatynyn kórsetkim keldi. Eń bastysy, dıvanda jata bermeı, balalarǵa úlgi kórsetip, osyndaı jarystarǵa qatysý kerek», deıdi Ýfýk Djengız. Bul sanatta Qojanovtar otbasy kúmis, Tólegenovtar áýleti qola júlde ıelendi. 12-13 jas sanatynda Salıkjanovtar otbasy birinshi oryn aldy. Shevchenko otbasy ekinshi, Qýanyshbaevtar úshinshi oryn tuǵyrynan kórindi.
Jeńimpazdardy marapattaý jáne quttyqtaý saltanaty lotereıa utysymen jalǵasty. Jarysqa qatysýshylar arasynda 5 velosıped oınatyldy.
Mıras ASAN,
«Egemen Qazaqstan»
