Osy oraıda Qazaqstan Respýblıkasynyń Tuńǵysh Prezıdenti – Elbasy Qory Qazaqstan jastarynyń kongresimen birge «Jas Qalam» jastar jýrnalıstıkasyn damytý jobasyn júzege asyrýdy bastaǵan bolatyn. Bul rette elimizdiń jýrnalıstıka salasynda jetistikke jetken jýrnalıster qaýymy jergilikti jerlerde sheberlik sabaqtaryn ótkizip, otandyq baspasóz salasynyń búgingi deńgeıin saralaıtyn bolady.
M.H.Dýlatı atyndaǵy Taraz memlekettik ýnıversıtetiniń Táýelsizdik zalynda «Jas Qalam» jobasynyń tuńǵysh forýmy ótti. Forým jumysyna óńirdegi barsha jas jýrnalıstermen qatar, atalǵan ýnıversıtettiń Jýrnalıstıka fakýltetiniń stýdentteri qatysty. Jıyndy Qazaqstan jastary kongresiniń tóraǵasy Toqtar Bolysov ashty. Áýeli Jambyl oblystyq jastar saıasaty máseleleri basqarmasynyń basshysy Mádı Máten sóz alyp, otandyq jýrnalıstıkanyń máni men mańyzyna toqtaldy. «Álbette, bilikti jýrnalıst mamandardyń artýyna tájirıbeli joǵary býyn ókilderi yqpal jasaýy qajet. Otandyq buqaralyq aqparat quraldarynyń tanymal jýrnalısteriniń kóp jyldyq tájirıbelerin bólisýi salaǵa qyzyǵýshylyǵy bar jambyldyq jastardyń alǵa qaraı damýyna oń áser etetini sózsiz. «Jýrnalıstiń arqalaǵany altyn, jegeni jantaq» dep Sherhan Murtaza aıtpaqshy, jýrnalıstıka – aýyr eńbekti, tynymsyz izdenisti, ushqyr sheberlikti jáne tereń bilimdi talap etetin mamandyq. Sońǵy kezderi elimizde ǵana emes, dúnıe júzinde aqparattyq salanyń róli artyp keledi. Memleket táýelsizdigin baıandy etý, azamattyq, quqyqtyq, izgilikti qoǵamnyń qalyptasýyna elimizdiń baspasózi orasan úles qosyp otyrǵanyn Elbasymyz únemi atap aıtyp, baǵasyn berýmen birge, jýrnalıstermen birlesip qyzmet etýdiń úlgisin kórsetip keledi», dedi ol óz sózinde.
Budan keıin respýblıkalyq «Jas qazaq» gazetiniń bas redaktory Sraıyl Smaıyl dástúrli jýrnalıstıka tóńireginde áńgime órbitti. «Búginde dástúrli jýrnalıstıka saqtalyp qala ma, álde onyń ornyn áleýmettik jelidegi túrli aqparattar basyp kete me degen saýal elimizdi ǵana emes, álemdi tolǵandyrýda. Máselen elimizde bolyp jatqan túrli jıyndarda dástúrli jýrnalıstıka qandaı baǵytta damýy kerek degen oı aıtylyp jatady. Degenmen, budan bylaı da dástúrli jýrnalıstıka saqtalyp qala beredi degen oıdamyn. Sonymen qatar jýrnalıstıkada mamandaný degen bar. Iаǵnı kásipti jaqsy kórý arqyly ózi biletin sala boıynsha eńbek etý. Qazir kóp jastar qaı taqyrypqa jazatynyn bilmeı qınalady. Teorııa boıynsha bilim alyp kelgen jastarǵa mamandaný qıyn», dedi ol.
Sonymen qatar jıyn barysynda «Qazaqstan» ulttyq telearnasyndaǵy «Másele» baǵdarlamasynyń avtory Nartaı Aralbaıuly telejýrnalıstıka boıynsha tabysty baǵdarlama túsirýdiń mańyzdylyǵy jóninde aıtsa, atalǵan baǵdarlamanyń rejısseri Jandos Qaltaev óziniń rejısserlik sheberligimen bólisti. Budan keıin jınalǵan jastar eki topqa bólinip tanymal jýrnalısterdiń sheberlik synyptaryna qatysty. Munda da otandyq jýrnalıstıkany damytý máseleleri sóz boldy. Jıyn barysynda bolashaq jýrnalıster is júzinde de tájirıbe almasty.
Aıta keteıik, 11 qyrkúıek kúni Taraz qalasynan bastaý alǵan joba 16 qyrkúıek kúni Almaty qalasynda, 25 qyrkúıekte Semeı qalasynda jáne 5 qazan kúni Astana qalasynda ótetin bolady.
Hamıt ESAMAN,
«Egemen Qazaqstan»
Jambyl oblysy
