Jıynǵa, sondaı-aq, Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri, Parlament depýtattary, memlekettik organdardyń, «Atameken» Ulttyq kásipkerler palatasynyń, úkimettik emes uıymdardyń, kásipker áıelder qoǵamdastyǵynyń ókilderi qatysty.
Gúlshara Ábdiqalyqova quttyqtaý sózinde Elbasy N.Á.Nazarbaevtyń Qazaqstan men О́zbekstan arasyndaǵy eki jaqty qarym-qatynastyń damýyna aıryqsha kóńil bóletinin atap ótti.
Memlekettik hatshy Qazaqstan Prezıdentiniń: «Bizdiń eki halyqtyń qarym-qatynasynyń shynaıy baýyrlastyq sıpaty óz tamyryn ǵasyrlar qoınaýynan tartyp, ata-babalarymyzdyń ortaq tarıhy men baı rýhanı murasy arqyly bekı túsedi» degen sózine nazar aýdardy.
G.Ábdiqalyqova Qazaqstanda áıelderdiń ekonomıkalyq múmkindikterin keńeıtýge baǵyttalǵan memlekettik saıasat júrgizilip otyrǵanyn aıtty.
– Demokratııalyq qoǵam qurýdyń negizgi baǵyttarynyń biri – genderlik tepe-teńdikti qamtamasyz etý. Táýelsizdik jyldarynda qomaqty nátıjelerge qol jetkizdik. Bizde áıelderdiń saıasatqa aralasýy jóninen ornyqty ilgerileýshilik bar. Májilistegi depýtattardyń 29-y áıel, bul – depýtattar sanynyń 27 paıyzynan astam kórsetkish. Ekonomıkada áıelder kásipkerliginiń qarqyndy sektory qalyptasty. Shaǵyn jáne orta bıznes sýbektileriniń 44 paıyzyn áıelder basqarady, olar bul saladaǵy barlyq jumys ornynyń úshten birin qamtamasyz etip otyr, – dedi Memlekettik hatshy.
Forýmda Qazaqstan Respýblıkasynyń Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa men О́zbekstan áıelderi komıteti arasyndaǵy yntymaqtastyq týraly memorandýmǵa qol qoıylyp, Qazaqstan men О́zbekstannyń kásipker áıelderiniń ınnovasııalyq bıznes-jobalary tanystyryldy. Sondaı-aq, taraptar ozyq tájirıbelerin ortaǵa saldy.
G.Ábdiqalyqova forým aıasynda О́zbekstan Respýblıkasy Premer-Mınıstriniń orynbasary, Áıelder komıtetiniń tóraıymy T.Narbaevamen birge áıelder bıznes qoǵamdastyqtary yntymaqtastyǵynyń, sondaı-aq áıelderdiń rólin arttyrý jáne olardyń múmkindikterin keńeıtýdiń ózekti máselelerin talqylady.
