«Qazaqstan men Túrkııa arasyndaǵy qatynastar ózara dostyqqa, baýyrlastyq pen senimge negizdelgen. Saýda aınalymy jóninen Túrkııa Qazaqstannyń strategııalyq seriktesteriniń alǵashqy ondyǵyna kiredi. Eki el arasyndaǵy taýar aınalymy 2017 jyly 27%-ǵa ósip, $2 mlrd jýyqtady», — dedi Nursultan Nazarbaev.
Memleket basshysy ınvestısııalyq yntymaqtastyq pen ekonomıkanyń túrli salalaryndaǵy birlesken jobalardy iske asyrý máselelerine toqtaldy. Atap aıtqanda, táýelsizdik alǵannan beri elimizge Túrkııa $3 mlrd astam ınvestısııa quıǵanyn jáne búginde Qazaqstanda túrik kapıtalynyń qatysýymen 2 myńǵa jýyq kásiporyn jumys istep otyrǵanyn atap ótti.
Sonymen qatar, Qazaqstan Prezıdenti eki el kásipkerlerin qoldaýǵa baǵyttalǵan «Jańa sınergııa» baǵdarlamasynyń júzege asyrylý nátıjeleri jóninde aıtty.
«Osy baǵdarlama aıasynda quny $800 mln bolatyn 23 joba iske qosylyp, 3 myń jańa jumys ornynyń ashylýyna múmkindik berdi. Keshe elderimizdiń bıznes ókilderi quny $1,7 mlrd asatyn 24 kelisim-shartqa qol qoıdy. Bul – bizdiń ózara senim men yntymaqtastyǵymyzdyń jarqyn mysaly», — dedi Nursultan Nazarbaev.
Kezdesý barysynda Memleket basshysy Qazaqstannyń ekonomıkalyq artyqshylyqtaryna jáne elimizde bıznes júrgizý úshin jasalǵan qolaıly jaǵdaılarǵa nazar aýdardy.
«Qazaqstanda ınvestısııalyq ahýaldy jaqsartý jóninde keshendi jumystar júrgizilýde. Kásipkerlikti damytý úshin zańnamaǵa tıisti ózgerister engizildi. Dúnıejúzilik banktiń "Bıznes júrgizý jeńildigi" reıtınginde Qazaqstan 190 eldiń arasynda 36-orynda. Bizdiń memleket Ekonomıkalyq yntymaqtastyq jáne damý uıymy Investısııalyq komıtetiniń múshesi bolyp sanalady», — dedi Qazaqstan Prezıdenti.
Sondaı-aq, Nursultan Nazarbaev Qazaqstan Respýblıkasynyń Prezıdenti janyndaǵy Sheteldik ınvestorlar keńesi men «Qazaq Invest» kompanııasynyń jumysy jáne ınvestorlar úshin qarastyrylǵan túrli jeńildikter jóninde aıtty.
«Qazaqstanda 11 arnaıy ekonomıkalyq jáne 24 ındýstrııalyq aımaq bar. Olardyń jumysyna qatysýshylar úshin salyqtyq jáne ózge de jeńildikter qarastyrylǵan. Túrik kompanııalaryn Qazaqstanda óz bıznesterin órkendetýge shaqyramyn», — dedi Memleket basshysy.
Sonymen qatar, Qazaqstan Prezıdenti elimizdiń kólik-tranzıt áleýetiniń múmkindikterine jan-jaqty toqtaldy.
«Qazaqstan Eýropa men Azııa arasyndaǵy transkontınentaldy mýltımodaldy júk tasymalyn belsendi damytýda. Elimiz arqyly bes temir jol jáne alty halyqaralyq avtomobıl joly ótedi. Transkaspıı mýltımodaldy júk tasymalyn damytý úshin kóp jumys atqarylýda. Aqtaý portyn jańǵyrtyp, onyń múmkindikterin keńeıttik», — dedi Nursultan Nazarbaev.
Memleket basshysy Qazaqstandaǵy ónerkásip kásiporyndaryn jekeshelendirý úderisine jáne agroónerkásip keshenindegi ınnovasııalyq jobalardy iske asyrýǵa sheteldik ınvestorlardyń qatysý múmkindigi bar ekenin de atap ótti.
Sonymen qatar, Qazaqstan Prezıdenti túrik bıznesmenderin Nazarbaev ýnıversıteti men Innovasııalyq tehnologııalar parki bazasynda qurylǵan ınnovasııalyq klasterlerdiń jumysyna atsalysyp, týrıstik saladaǵy birlesken jobalardy júzege asyrý múmkindikterin qarastyrýǵa shaqyrdy.
«Ekspo-2017» kórmesiniń bazasynda "Astana" halyqaralyq qarjy ortalyǵy jumysy isteı bastady. Bul ortalyq Nıý-Iork, Sıngapýr, London jáne Dýbaı qalalaryndaǵy qarjy ortalyqtarynyń úzdik modeli negizinde jumys júrgizedi. Onyń quqyqtyq mártebesi konstıtýsııalyq zańmen bekitildi, jumys tili – aǵylshyn tili. Bul – óńirdegi qyzmeti aǵylshyn quqyǵyna negizdelgen birden-bir ortalyq», — dedi Nursultan Nazarbaev.
Memleket basshysy «Astana» halyqaralyq qarjy ortalyǵynyń negizgi artyqshylyqtary jóninde aıtyp, bul ortalyqtyń jumysyna qatysýshylar úshin arnaıy salyq, valıýta, vıza jáne eńbek rejimderi engizilgenin atap ótti.
Sońynda Qazaqstan Prezıdenti eki el bıznesmenderin búgingi jasalyp otyrǵan múmkindiktiń bárin paıdalana otyryp, memleketaralyq baılanystardy damytý jáne nyǵaıtý isine belsendi atsalysýǵa shaqyrdy.
Sonymen qatar, Nursultan Nazarbaev «Koch Holdıng» kompanııasy basqarmasynyń tóraǵasy Alı Iyldyrym Kochpen kezdesti.
Kezdesý barysynda taraptar saýda-ekonomıkalyq yntymaqtastyqty damytý jáne Qazaqstanda ınvestısııalyq jobalardy iske asyrý perspektıvalaryn talqylady.
«Koch Holdıng» kompanııasy basqarmasynyń tóraǵasy qorǵanys ónerkásibindegi jáne ekonomıkanyń basqa da óndiris salalaryndaǵy jobalardy júzege asyrýǵa múddelilik tanytty.
Budan keıin Memleket basshysy «Iyldyrym grýpp» kompanııasy basqarmasynyń tóraǵasy Robert Iýksel Iyldyrymmen kezdesti.
Kelissóz barysynda Qazaqstan Prezıdenti men túrik kásipkeri hrom óndirý jáne hımııa óndirisi salalaryndaǵy ınvestısııalyq jobalardy júzege asyrý máselelerin talqylady.
Memleket basshysy búginde Aqtóbe oblysynda túrik kompanııasy jumys istep jatqanyn aıtyp, ınvestorlardyń eki el arasyndaǵy ekonomıkalyq yntymaqtastyqty odan ári nyǵaıtýǵa baǵyttalǵan josparlaryn qoldaıtynyn bildirdi.
