Ekonomıkany jańǵyrtýdyń Úshinshi tolqyny men ósimniń jańa modelin qurýdyń qazirgi jaǵdaıynda agroónerkásiptik keshenniń mańyzy arta túsýde. Bul – strategııalyq sala, áleýetti lokomotıv. Maqsat – aldaǵy 5 jyldyń ishinde agroónerkásiptik keshendegi eńbek ónimdiligi men qaıta óńdelgen ónimder eksportyn 2,5 esege ulǵaıtý. Bul oraıda aýyl sharýashylyǵy taýaryn óndirýshiler úshin qarjylandyrý men ónim ótkizý rynoktarynyń qoljetimdi bolýyna jáne eksportty damytýǵa kóńil bólinedi.
Sonymen birge álemdik rynoktaǵy ahýal turaqsyz, jyldam ózgerýde. Valıýtalyq nesıe túrinde júktemesi bar agrarlyq sala syrtqy sebepterdiń aýyrtpalyǵy jaǵdaıynda damýda. Sondyqtan Úkimet pen Ulttyq Bank aýyl sharýashylyǵy taýaryn óndirýshilerdi jáne búkil agrarlyq sektordy qoldaýdyń qosymsha is-sharalar paketin daıyndady. Basty maqsat – salanyń serpindi ósýine qajetti jaǵdaı jasaý, jańǵyrtýdyń qarqynyn tómendetpeý, kúrmeýi kúrdeli máselelerdi sheshý. Is-sharalardyń ishinde AО́K kásiporyndaryna túsetin boryshtyq júktemelerdi azaıtýǵa erekshe kóńil bólinip otyr.
Iske asyrý tetikteri – QazAgro holdınginiń talaptaryn qaıta qurylymdaý jáne dollarsyzdandyrý, AО́K-ti damytýdyń memlekettik baǵdarlamasynyń jańa quraldaryn paıdalaný.
Is-sharalar paketinde qarjylyq ınstıtýttardyń, onyń ishinde AО́K damytýdyń baǵdarlamasyn iske asyrý boıynsha seriktes-bankterdiń jumysyna serpin beretin birqatar qarjylyq tetikter bar.
«Sesnabank» «Agrobıznes 2020» baǵdarlamasy men kásipkerlikti qoldaýǵa arnalǵan memlekettik baǵdarlamalardyń jobalaryn iske asyrýǵa belsendi atsalysyp keledi. Onyń úlesine salany nesıelendirýdiń 65%-ten astamy tıesili. Sol sebepten, «Sesnabank» «QazAgro» holdıngimen birlese otyryp, berilgen valıýtalyq nesıeler men qaryzdardy qaıta qarjylandyrýdy jáne onyń merzimin uzartý máselesin qolǵa aldy.
Bul jumystar aıasynda Úkimet pen Ulttyq Bank «Sesnabankten» 450 mlrd teńgege aýyl sharýashylyǵy nesıeler portfelin satyp alý tetikterin pysyqtaýda. Bul bankten qaryz alýshy agroónerkásiptik sektor kásiporyndaryn qarjylyq saýyqtyrýdy qamtamasyz etýge múmkindik beredi, sondaı-aq «Sesnabanktiń» qarjylyq turaqtylyǵyn nyǵaıtady. «Sesnabanktiń» aksıonerleri bankti kapıtaldandyrý arqyly jeke qarajattary esebinen qaryz alýshylardy saýyqtyrýǵa qatysady.
Bul sharalardy iske asyrý otandyq aýyl sharýashylyǵy ónimderin óndirýshilerdiń múddesin qorǵaıdy, nesıelendirýdiń kólemin arttyrady jáne agrarlyq sektordy jańǵyrtý saıasatyna qoldaý jasaıdy.
