Kongress jumysyna Azııanyń, AQSh-tyń jáne Eýropanyń 20 elinen 200-den astam ókilder keldi. Olardyń qatarynda álemniń jetekshi ýnıversıtetteriniń ǵalymdary, ulttyq sapa uıymynyń ókilderi, sondaı-aq bıznes-qurylymdardyń menedjerleri bar.
Kongressti Azııa sapa jelisiniń prezıdenti Azat Ábdirahmanov quttyqtaý sózimen ashyp, sóz kezegin qatysýshylarǵa usyndy. «Atameken» Ulttyq kásipkerler palatasy tóraǵasynyń orynbasary Eldos Ramazanov «Atameken» UKP tóraǵasy Asqar Myrzahmetovtyń qatysýshylarǵa arnaǵan sózin oqyp, sapa salasyna qatysty bul kongresstiń mańyzyn atap ótti.
Al, óz kezeginde Tehnıkalyq retteý jáne metrologııa komıtetiniń tóraǵasy Arman Shaqqalıev Azııa sapa jelisiniń sapa menedjmentine qatysty sharalary dúnıe júzindegi aldyńǵy qatarly tájirıbelerdi ıgerýge yqpaldasatyndyǵyna toqtaldy.
Kongress jumysy dúnıejúzine tanymal sapa menedjmenti salasyndaǵy kásipqoı mamandar professor Norıakı Kano (Japonııa), Klaes Berlın (Shvesııa), Mohamed Zaırı (Ulybrıtanııa), Lın Haı (Qytaı), Van Seon Shın (Ońtústik Koreıa) jáne t.b. sapa menedjmentindegi júıeli ári ozyq ádisterge negizdelgen tájirıbelerimen jalǵasyn tapty.
Kompanııalardy basqarýdyń eń ozyq tujyrymdamasymen tanystyrýǵa, kóshbasshylyqqa qol jetkizý, básekege qabilettilik salasynda úzdik dúnıejúzilik praktıkalyq tájirıbesi týraly aqparat taratý men óndiris oryndarynyń ónimderi men kórsetetin qyzmetterine baǵyttalǵan kongress barysynda ANQ Basqarma tóraǵasy Azat Abdrahmanov, «Atameken» UKP tóraǵasynyń orynbasary Eldos Ramazanov jáne ANQ qurmetti prezıdenti Norıakı Kano qazaqstandyq bıznesmender, kásiperler úshin sapa salasynda jetistikterge jetýge baǵyttalǵan jetistikterdi engizý týraly yntymaqtastyq Kelisimine qol qoıdy. ANQ qurmetti prezıdenti Norıakı Kano saladaǵy úzdik menedjerlerge arnaıy syılyq tapsyrdy.
2002 jyly qurylǵan Azııa sapa jelisi (ANQ) Azııada negizgi mıssııasy ǵylym men tehnıkanyń progresine kómektesý, ónerkásiptiń damýy men adam ómiriniń sapasyn jaqsartýǵa atsalysatyn uıym bolyp tabylady. Oǵan Azııanyń 17-den astam memleketiniń Ulttyq sapa uıymdary kiredi, onyń ishinde: Qazaqstan, Úndistan, Qytaı, Ońtústik Koreıa, Reseı, Sıngapýr, Japonııa, Taıland, t.b. bar. Azııa sapa uıymyn qurýdyń bastamashysy sapa menedjmentiniń bilgir mamany – Norıakı Kano.
Osy is-sharaǵa qatysý úshin Qazaqstan aımaqtarynan birqatar kompanııa ókilderi de qatysýda. Kongress kásiporyndardy basqarýda, ınnovasııalardy paıdalaný máselelerine oraı tájirıbe alańy bolyp tabylady ári bolashaqta sapaly ónim qataryn kóbeıtip, kórsetiletin qyzmetterdiń sapasyn arttyrýǵa múmkindik beredi.
Kongress sheńberinde kásiporyndar arasynda yntymaqtastyqqa qol jetkizý maqsatynda qazaqstandyq óndirýshilerdiń kórmesin ótkizilýde.
Elvıra SERIKQYZY,
«Egemen Qazaqstan»
ALMATY
