Kelissózder barysynda eki eldiń syrtqy saıası vedomstvolarynyń basshylary túrli salalardaǵy ekijaqty yntymaqtastyqtyń qazirgi ahýaly men perspektıvalaryn talqylap, aımaqtyq jáne halyqaralyq kún tártibindegi ózekti máseleler boıynsha pikir almasty.
Qazaqstan Afrıka elderi, sonyń ishinde Gambııamen ekijaqty qarym-qatynasty damytýǵa úlken mán berip otyrǵany atap ótildi. «Qazaqstan Afrıkadaǵy úlken áleýetke ıe prosesterge qyzyǵýshylyqpen qarap otyr. Bizdiń elimiz 2013 jyldan beri Afrıka Odaǵyna baıqaýshy el bola otyryp, bul uıymnyń ósip kele jatqan mańyzdylyǵyn atap ótemiz. Astana osy uıymmen tıimdi jumys baılanystaryn ornatýǵa jáne onyń múshelerimen yntymaqtastyqty odan ári nyǵaıtýǵa múddeli», - dedi Q. Ábdirahmanov.
Gambııanyń QR Prezıdenti Nursultan Nazarbaevtyń taratpaý, qarýsyzdaný, terrorızmge qarsy turý, turaqty áleýmettik-ekonomıkalyq damýdy qamtamasyz etý jónindegi syrtqy saıası bastamalaryna qoldaý kórsetýi atap ótildi. Oǵan qosa, bul batysafrıkalyq memleket Qazaqstannyń 2017-2018 jj. arnalǵan BUU Qaýipsizdik Keńesiniń turaqty emes múshesi retinde kandıdatýrasyn qoldady, sondaı-aq «EKSPO-2017» Halyqaralyq mamandandyrylǵan kórmesine qatysty jáne QR Prezıdentiniń bastamasy bolyp sanalatyn Azyq-túlik qaýipsizdigi jónindegi Islam uıymynyń Jarǵysyna qol qoıyp, ony ratıfıkasııalady.
IYU sheńberinde yntymaqtastyq máseleleri jeke talqylandy. Qazaqstannyń syrtqy saıası vedomstvosynyń basshysy 2019 jyly Gambııada ótetin IYU 14-shi sammıtiniń uıymdastyrylýyn quptaıtynyn jáne qazaqstandyq delegasııa tıisti deńgeıde qatysatyndyǵyn málimdedi.
Ekonomıkalyq saladaǵy yntymaqtastyq perspektıvalaryn talqylaý barysynda Q. Ábdirahmanov Qazaqstan energetıka, taý-ken ónerkásibi, ınfraqurylym jáne týrızm salalaryndaǵy eki jaqty yntymaqtastyqty damytýǵa múddeli ekenin atap ótti.
