Kórmeniń ashylý saltanatyna Qazaqstan Respýblıkasy Prezıdenti keńsesiniń basshysy, QR Tuńǵysh Prezıdenti – Elbasy Kitaphanasy dırektorynyń mindetin atqarýshy Mahmud Qasymbekov, Atyraý oblysynyń ákimi Nurlan Noǵaev, óńirdiń zııaly qaýym ókilderi men stýdent jastary qatysty. Maxmud Qasymbekov Jaıyq jaǵasyna Elbasynyń arnaıy tapsyrmasymen kelgenin atap ótti.
-Qasıetti Atyraý jerine úlken tarıxı mańyzy bar qundy jádiger alyp keldik. Tuńǵysh prezıdentimiz N.Nazarbaevtyń kóshpeli mýzeıinen kelgen kórmede 1000-nan asa qundy jádigerler men qoljazbalary, 50-den asa memleket tabystaǵan marapattar bar. Sonymen qatar, Elbasynyń tikeleı nusqaýlyǵymen munaıly ólkege 130 adamnan quralǵan prezıdent orkestrimen birge kelip otyrmyz. Bul Elbasynyń Atyraý jurtshylyǵyna arnaıy syıy,- deıdi QR Prezıdenti keńsesiniń basshysy.
Kitaphana jınaqtary negizinde Qazaqstan Respýblıkasynyń Tuńǵysh Prezıdenti – Elbasynyń táýelsiz Qazaqstannyń tarıhı ómirindegi rólin júıeli túrde keńinen kórsetýdi maqsat etken kórme tórt bólimnen turady.
Saltanatty sharada oblys ákimi Nurlan Noǵaev: «Táýelsiz Qazaqstan men Nursultan Nazarbaev - egiz uǵym. Elimiz táýelsizdikke qol jetkizbeı turyp, bolashaǵyn saraptaı almaǵan kezde Elbasymyz jeke jaýapkershilik alyp, barlyq qazaqstandyqtar qoldaýymen álemdik qaýymdastyqta óz orny bar memleketimizdi qurǵan bolatyn. Osy kezeńderde prezıdentimiz kóregendiligimen talaı syndarly saǵattardan ótti. Búgingi beıbitshiligimiz sol eńbektiń jemisi. Kórme barysynda Elbasy týraly buryn-sońdy beımálim bolǵan aqparattardy alyp, saıasattaǵy tulǵalardyń elimiz, kóshbasshymyz týraly oı-pikirlerimen tanysa alasyzdar. Búgingi shara - tarıxı shara. Sol tarıxtyń kýási bolýǵa barlyǵyńyzdy shaqyramyn,- dep atap ótti.
Kóshpeli kórme jobasy buǵan deıin Almaty, Shymkent qalalarynda júzege asqan. Eki qalada da joǵary deńgeıde ótken kórmeni 250 myńnan astam adam tamashalapty. Endi bul qatardy munaıly óńir turǵyndary tolyqtyrady.
Joba aıasynda QR prezıdenti keńsesiniń basshysy Maxmud Qasymbekov atyraýlyq stýdenttermen kezdesti. H.Dosmuxamedov atyndaǵy Atyraý memlekettik ýnıversıtetinde stýdentterge arnalǵan Qazaqstan Respýblıkasynyń tuńǵysh prezıdenti - Elbasy kitapxanasynyń - "Rýxanı jańǵyrý : Bolashaqqa bastar jol" atty semınar-trenıngi ótti.
-Atyraýǵa kelgen issapar barysynda eń aldymen Elbasynyń ómir joly týraly kitaptardy tabystaýdy jón kórdim. Bul kitaptarda prezıdentimiz, onyń ómirbaıany, sondaı-aq prezıdenttik joly týraly derekter bar. Osy derekterdi oqý úrdisine paıdalanýdy usynamyn. Jastarymyz el men Elbasy tarıxynan xabardar bolýy kerek,- deıdi Maxmud Qasymbekov.
Kóshpeli kórmeniń saltanatyn QR memlekettik kúzet qyzmeti Prezıdenttik orkestriniń arnaıy konserti aıshyqtaı tústi. Atyraýda alǵash bolǵan ujymnyń merekelik konsertin myńnan astam adam tamashalady. Aıta keteıik, Elbasy kórmesi eki aı boıy oblystyq mýzeıde bolady.
Baqytgúl BABASh,
«Egemen Qazaqstan»
ATYRAÝ
