Bul jol kartasynyń negizgi mindeti – halyqtyń memlekettik derekter bazasyndaǵy mártebesin sáıkestendirý. «Osy baǵytta Atyraý oblysynda ótken jyly óńirlik shtab quryldy. Memlekettik organdardyń aqparattyq júıelerinde azamattar mártebesin ózektendirý jáne ony rásimdeý boıynsha kóptegen jumys atqaryldy», deıdi oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Ulyqbek Tinálıev.
Basqarma ókiliniń aıtýynsha, jyl basynda 54 668 adamnyń mártebesi bolmaǵan, 12 qyrkúıektegi málimet boıynsha 22 922 adamnyń mártebesi sáıkestendirildi. Mamandar arnaıy tizimmen úılerdi aralap, «mindetti jarnalaryn tólemeı jumys isteıtin jumysshylar» jáne «ózin-ózi jumyspen qamtyǵandar» retinde belgili bolǵan adamdarǵa mártebesin anyqtaý jáne túsinikteme alý úshin jumyspen qamtý ortalyqtaryna, memlekettik eńbek ınspeksııasyna, aýyl ákimderine júginý qajettiligi týraly habarlama berdi. Endi «stýdentter», «shyǵyp ketkender» jáne «qaıtys bolǵandar», «tirkelmegen jumyssyzdar men ózin-ózi qamtıtyndar» sanattary boıynsha mártebesi ózektendirilmegen 31 746 adam qalyp otyr.
«Aldaǵy ýaqytta formaldy emes jumyspen qamtylǵan adamdardy rásimdeý maqsatynda «Biryńǵaı jıyntyq tólemdi engizý» zań jobasy qoldanysqa enedi. Bul zań jobasy adamdardy medısınalyq jáne áleýmettik saqtandyrý, zeınetaqymen qamsyzdandyrý júıelerine tartý, ózin-ózi jumyspen qamtyǵan adamdar sanatyna qosý sharalary maqsatynda júrgiziledi», – deıdi U.Tinálıev. Baǵdarlama aıasynda 2 053 atyraýlyq jumyspen qamtylǵan.
Baqytgúl BABASh,
«Egemen Qazaqstan»
ATYRAÝ
