Búgin Astana qalasynda VI Qazaqstan mashına jasaýshylary forýmy bastaldy. Forýmnyń taqyryby: «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri».
Meıram Pishembaev Forým jumysyna AQSh, Germanııa, Italııa, Reseı, Túrkııa, QHR jáne t.b. sekildi álemniń 20 elinen 1000-nan astam delegat qatysatynyn atap ótti.
«Forým qatysýshylary jyldan jylǵa sandyq ári sapalyq jaǵynan artyp keledi. Qazaqstan mashına jasaýshylarynyń jyl saıynǵy forýmy mashına jasaýshylar salasynyń mańyzdy oıynshylary qatysatyn biregeı alań retinde tanyldy. Forým jalpy bıznes qaýymdastyq úshin jáne jekeleı alǵanda mashına jasaý ındýstrııasy úshin úlken mánge ıe jáne edáýir paıda ákeletini sózsiz», — dedi M. Pishembaev.
BAQ suraqtaryna jaýap bere otyryp, QR Mashına jasaýshylar odaǵynyń basqarma tóraǵasy Indýstrııa 4.0 elementterin engizý týraly aıtyp berdi.
«Tórtinshi ónerkásiptik revolıýsııanyń damýyn árbir qazaqstandyq sezine alady. Búginde osyǵan deıin tańǵajaıyp retinde sanalǵan ıdeıalar shyndyqqa aınalýda. Bul – avtopılottar, kombaınersiz astyq jınaıtyn pılotsyz kombaındar, aqyldy úıler, jasandy zerde», — dedi ol.
Sondaı-aq, onyń aıtýynsha, tórtinshi ónerkásiptik revolıýsııanyń kezekti belgileri — robottandyrý, avtomattandyrý, sıfrlandyrý, zattar ınterneti, jańa kompozıtti materıaldar jasaý. Mashına jasaý salasy trendte bolýy tıis.
«Ásirese tórtinshi ónerkásiptik revolıýsııa jaǵdaıynda ekonomıkanyń, sonyń ishinde, mashına jasaý salasynyń, básekege qabiletti ónimdi shyǵarýdyń, eńbek ónimdiligin arttyrý men jańa addıtıvti tehnologııalardy engizýdiń tehnologııalyq jańǵyrýy biz úshin óte mańyzdy. Osy máselelerdiń barlyǵy Mashına jasaýshylar forýmynda keńinen talqylanbaq», — dedi M. Pishembaev.
Sonymen qatar, ol mashına jasaý salasynda bir jumys orny ashylǵannyń ózinde, oǵan irgeles ónerkásip salalarynda on shaqty jumys orny ashylatynyn, osylaısha kadrlardyń biliktiligi artyp, kúrdeli tehnıkany shyǵarý kólemi ulǵaıyp, eksportqa baǵdarlana bastaıtynyn atap ótti.
Forým aıasynda sheteldik seriktestermen birlesken kásiporyndar qurý, tehnologııalar transferti týraly memorandýmdarǵa qol qoıylady. Sonymen qatar, qatysýshylar otandyq mashına jasaýdy odan ári damytý, básekege qabilettilikti arttyrý boıynsha tájirıbelik usynystar jasaıdy.
Forýmnyń basty erekshelikteriniń biri — Forým aıasynda Qazaqstannyń mashına jasaý salasyn damytýdyń 2019–2030 jyldarǵa arnalǵan keshendi josparynyń jobasy tanystyrylady, ol orta merzimdi kezeńde salany damytýdyń strategııalyq jospary bolady.
Keshendi jospardyń maqsaty — otandyq mashına jasaýdyń básekege qabilettiligin arttyrý, ishki naryqty Qazaqstanda shyǵarylǵan ónimdermen qamtamasyz etý, eksport deńgeıin ulǵaıtý. Keshendi jospar jańa sapalyq deńgeıge kóshýdi – negizgi óndiristi jańǵyrtýdy kózdeıdi. Qoldaý turǵysynan josparda qarjylyq emes, qarjylyq, onyń ishinde qoldaýdyń qazynalyq sharalary qarastyrylǵan. Tabysqa jetip, tıimdilikti arttyrýǵa, tehnologııalyq jańartýǵa qarajat salýǵa, básekeli ónimder shyǵarýǵa jáne jahandyq naryqqa shyǵýǵa múddeli mashına jasaý kásiporyndaryna jan-jaqty qoldaý kórsetiledi.
