Móldir Saǵyndyqova sýret ónerin búkil óne boıynan ótkizip, onyń qadir-qasıetin es bilgennen-aq jadyna toqyp ósken kásibı sýretshi. О́rimdeı qyzdy osynaý álemge ińkár etken týǵan jerdiń tumsa tabıǵaty men áke tárbıesi bolsa kerek. Ákesi de qolóner sheberi. Perzentiniń boıynan talant ushqynyn baıqaǵan ol, qyzynyń bolashaǵynan zor úmit kútipti. Áke úmiti men ónerge degen qushtarlyq qarshadaı qyzdy arman arqalatyp qalaǵa attandyrǵan.
– О́z qatarlastarynyń ishinde batyl, shoqtyǵy bıik, tústeri qanyq qyzdarymyzdyń biri Móldir. Tústerdi emin-erkin qoryqpaı paıdalanýy, ashyq qarańǵy tustaryn tańbalarmen alǵanda erkin kósiltip salatyny, tústerdi qubyltýy, oınatýy arǵy jaǵymyzdan kele jatqan rýhymyzdyń bıiktigin kórsetip turady. Kenep betin durys sheshimmen paıdalanady, kompozısııalyq sheshimi ózgelerge uqsamaıdy. Birizdilikten, elikteýden ada. О́z jolyn taýyp, ómirge jańalyq ákelgisi keledi. Daralyqqa degen umtylys, jańalyqqa qushtarlyq, erekshelik tabýǵa degen talpynys onyń ishki dúnıesinen syr beredi. Shynaıylyq bar. Týa bitken talanty men osy atalǵan qasıetteri ony úlken shyǵarmashylyq jolǵa ákeledi dep senemin, – deıdi Qazaqstan Sýretshiler odaǵynyń múshesi Shattyq Batan.
Onyń kartınalary sheberlikpen stılıstıkalyq mádenıetke, erekshe kóńil-kúıge, mahabbat pen meıirim shýaǵyna toly. Túspen jáne formamen, keńistikpen jáne syzyqpen batyl jumys isteıdi, sezim syry rýhtyń kúshimen órile bitken jigerli de kórkem, sıqyrly obrazdar týdyrady. Keıipkerlerin ómirdiń ózinen, aınalasyndaǵy adamdardan izdeıdi. Uıyqtap jatqan stýdent, armandap otyrǵan qyz, keshki qonaq syndy turmystyq taqyryptarda órilgen kartınalarynda janǵa jaıly jylylyq bar. Úmit, arman, saǵynysh, muń sekildi sezimderdi kenep betindegi keıipkerleri arqyly beredi.
«Sýret salý men úshin kádimgi terapııa ispetti. Kóńilim qulazyǵanda nemese qatty qýanǵan sátte shabyttanamyn. Kóńil-kúıim bolmaǵanda aınadaǵy óz beınem arqyly kompozısııa salamyn, sol kezde janym rahat taýyp kóńilim kóteriledi. Osyndaı shaqtarda salynǵan jumystar kóbine-kóp sátti shyǵady. Ásirese óz týǵan jerimdi, balalyq shaǵymdy beınelegim keledi. Taý baýraıyna baryp tabıǵatqa shynaıy qarap turyp salǵandy janym súıedi. Osylaı salynǵan etıýdter fotosýretke qaraǵanda sol kezdegi sezimderdi sátti bere alady» deıdi Móldir.
Terezege qarap telmirip otyrǵan beıtanys arýdyń janarynda jasyrynǵan móltek syr, aına aldynda óz beınesin somdaý arqyly óz bolmysynyń sýretin kórsetkisi kelgen sýretshi qyz sizdi de óz jan-dúnıeńizdiń aınasyna úńilýge shaqyrady.
Arman OKTIаBR,
«Egemen Qazaqstan»
ALMATY
