Kóshpendiler fılosofııasy, dala órkenıeti, keńistik pen ýaqyt túsinigin jańasha túrlendirip júrgen Syrlybektiń kartınalary emosııalyq qabyldaýdan góri ıntellektýaldy oılanýǵa jeteleıdi. Máselen, ótken men búginniń toǵysyndaǵy áıel ǵumyryn arqaý etken «Dala áýeni» (2011) atty foto serııasynda da ıdeıalyq mańyz aldyńǵy orynǵa shyǵarylǵan. Ondaǵy áýenge qulaq salsańyz, kúıbeń tirliktiń tasasyndaǵy áıel ómiriniń alystan talyp jetken úni birte-birte údeı túskenin baıqar edińiz. Áıel ala tańnan qara keshke deıin bel jazbastan jumys isteı júrip besigin tóbesine kóteredi. Qym-qýyt tirlikte eshkimge renjigen emes, eshteńeden túńilgen emes. Áýelden solaı bolýy kerek kóringen. «Jazmyshtan ozmysh joq» degenge ábden moıynsunǵan jáne bul áýen úzilmesten jalǵasa bermek.
«Bul dala – meniń týyp-ósken jerim. Munda balabaqsha, kınoteatr sııaqty mádenı oryndar atymen joq. Aınalańnan kóretiniń japan dala, qula túz. Al bul fotosýrettegi áıelder bolmysynyń ózindik sebebi bar. Men es bilgeli anamnyń qoly bos otyrǵanyn kórgen emespin. Sıyr saýýdan atatyn tańy qora-qopsynyń, úı sharýasynyń ómiri bitpeıtin jumystarymen jalǵasa beretin. Meniń sheshem ǵana emes, barlyq shalǵaıdaǵy áıelderdiń ómiri osylaı bir-birine uqsas. Túgesilmeıtin sharýanyń bitpeıtin áýeni meniń janyma batady», deıdi fotosýretshiniń ózi.
Ol kez kelgen fotosýretti túsirmes buryn aldymen jobanyń jekelegen kórinisterinen bastap, tutas qurylymynyń eskızin syzyp alady. Eksperımentaldyq-sımvolıkalyq mánerdegi mundaı týyndylarynyń biri retinde Qazaqstannyń túrli óńirlerinde túsirilgen 7 bólimnen turatyn «Úlken málimet» (2013) atty jumysyn aıtýǵa bolady. Munda da bas taqyryp – aýyl tirshiligi.
Jalpy, Syrlybektiń sheberhanasy dáýir atmosferasynyń formalyq-mazmundyq izdenisterimen daralanady. Qoja Ahmet Iаsaýı atyndaǵy Halyqaralyq qazaq-túrik ýnıversıtetin grafıka mamandyǵy boıynsha aıaqtaǵan ol keıingi jyldary ınstallıasııa, foto-vıdeo ınstallıasııasy, perfomans janrynda sheberligin shyńdap keledi. Forma qalyptastyrýǵa erekshe mán beretin sýretshiniń qaı shyǵarmasynda bolsyn jan tebirenisi men janashyrlyqtan týǵan tereń kúızelisi, bárimizge etene tanys ómir shyndyǵy jatyr.
Aıa О́MIRTAI,
«Egemen Qazaqstan»
