Bul kezdesý astanalyqtar úshin sátti bastaldy. 1-mınýtta-aq Roman Starchenko men Andre Peterssonnan pas alǵan kanadalyq shabýylshy Patrıs Korme esep ashty.
Birinshi kezeń «Barystyń» basymdylyǵymen ótip jatqanymen, 13-mınýtta aıdyn ıeleri esepti teńestirip ketti. Aleksandr Nıkýlın men Gennadıı Stolıarov qatysqan jyldam shabýyldan keıin Darren Dıstiń jetip úlgermegenin paıdalanǵan Alekseı Makeev Henrık Karlsson qorǵaǵan qaqpanyń ashyq tusyna súńgite saldy 1:1.
Ekinshi kezeń basynda aıdyn ıeleri P.Kormege qarsy tártip buzǵanymen, tóreshiler ony «kórmeı qaldy». Esesin ekelesi sátte «Barystyń» hokkeıshisi aıdynnan qýyldy. Soǵan qaramastan, Álıhan Ásetov «Vıtıazdiń» qaqpashysy Ionı Ortıomen jekedara shyqqanymen, ońtaıly sátti paıdalana almady. Degenmen qarqynyn údetken astanalyqtar degenine jetti. 26-mınýtta kanadalyq Mettıý Frettın soqqan shaıba A.Nıkýlınniń konkıine tıip, qaqpaǵa kirip ketti - 2:1. Kóp uzamaı «Barys» oıynshylary san basymdylyǵyn qur jibermeı, kanadalyq qorǵaýshy Djessı Bleker esepti 3:1-ge jetkizdi. Úshinshi, sheshýshi kezeńde tóreshiler qarsylasyn qolmen ustap, tejedi degen jeleýmen Álıhan Ásetovti aıdynnan qýdy. Sony paıdalanǵan «Vıtıazdan» Gennadıı Stolıarov 45-mınýtta esepti qysqartty.
Kezdesý aıaqtalýǵa sál qalǵanda, qaqpashysyn altynshy oıynshyǵa almastyrǵan aıdyn ıelerinen Voıteh Mozık tarazy basyn teńestirip ketti - 3:3. Osylaısha match overtaımǵa, odan býllıtke ulasty. Býllıt serııasynda jeńiske jetken «Barys» Shyǵys konferensııasynda 13 upaı jınap, altynshy orynǵa kóterildi. Ár konferensııadan úzdik segiz komandanyń pleı-off básekesine joldama alatyny belgili.
Aıta keteıik, elordalyqtar kelesi matchyn 29 qyrkúıek kúni Latvııa astanasy Rıgada jergilikti «Dınamomen» ótkizedi. Rıgalyqtar 13 upaımen Batys konferensııasynda besinshi orynda keledi.
