Shekaralas aımaqtarda medısınalyq týrızmdi damytýdyń mańyzy zor ekenin Qazaqstan da, Reseı de jaqsy túsinedi. Osyndaı yntymaqtastyq Soltústik Qazaqstan jáne Túmen oblystary arasynda jaqsy jolǵa qoıylǵan.
Teriskeıge arnaıy saparmen kelgen túmendik aq halatty abzal jandar jergilikti emdeý mekemelerin aralap, tehnıkalyq jabdyqtalý jaıymen tanysty. «Dóńgelek ústel» otyrysynda medısınalyq týrızm salasyn damytý máseleleri jan-jaqty talqylandy.
Densaýlyq saqtaý salasynda sheshimin tabatyn ózekti problemalar az emes. Sonyń biri óńirde ókpeniń qaterli isigi aýrýlaryna shaldyǵýshylardyń azaımaı otyrǵany. Dárigerler onyń sebebin dertti bastapqy kezeńinde anyqtaý múmkindiginiń jetkiliksizdigimen, adamdar skrınıngtik tekserýden ótýge qulyqsyzdyǵymen túsindiredi. Onkologııalyq dıspanser ÝZI, hımııalyq terapııa, dıagnostıka kabınetterimen jaqsy jabdyqtalǵan. Innovasııalyq tehnologııalar oblystyq balalar aýrýhanasynda da qoldanylady. Mundaǵy hırýrgııa jumysy 80-90 paıyzǵa jańarǵan.
«Sheteldik fırmadan lızıng arqyly endoskopııalyq qurylǵylar satyp alyndy. Otalardyń basym bóligi ozyq ádister arqyly júzege asyrylady. Búırek aýrýlaryna shaldyqqan naýqastar respýblıkalyq aýrýhanalarǵa jiberilip kelse, ota endi ózimizde jasalmaq. Qulaq dertterin de hırýrgııalyq jolmen emdeımiz», deıdi oblystyq balalar aýrýhanasynyń bas dárigeri Oleg Zavıalov.
Munda medısınalyq týrızmdi birtindep damytýdyń birqatar jobalary qarastyrylǵan. Bıyl Reseıdiń birneshe turǵynyna jańa lor qurylǵysy arqyly ota jasalypty. Meımandar oblystyq eresekter aýrýhanasynda, kardıologııalyq ortalyqta bolyp, tehnıkalyq jaraqtandyrylýdyń joǵary deńgeıde ekenine, bilikti mamandarmen qamtylǵanyna kóz jetkizdi. Reseımen qatar Qyrǵyzstan men О́zbekstannan da adamdar emdelýge keledi. Elektrokardıogrammalardyń tikeleı qabyldanýy mıokard ınfarktynyń aldyn alýǵa kómektesedi eken. Túmendik áriptester jergilikti emdeý mekemeleriniń sheteldegiden esh kem túspeıtin tehnıkalyq jabdyqtalýyna joǵary baǵa berdi.
Túmen oblysy medısınalyq týrızm ortalyǵynyń dırektory Vadım Gadevıchtiń aıtýynsha, eń bastysy - medısınalyq qural-jabdyqtardyń múmkindigin tolyq paıdalaný. Bul jaǵynan alǵanda úırenetin tájirıbeler az emes. Túmendik mamandar da TMD elderiniń turǵyndaryn kóp qabyldaıdy. Olardyń arasynda Qazaqstan azamattarynyń sany basym. Ol medısınalyq qalashyq salynyp jatqanyn, munyń ózi medısınalyq týrızm boıynsha baǵdarlamalardy júzege asyrýǵa múmkindik beretinin jetkizdi.
Qos taraptyń kezdesýinde sapaly medısınalyq qyzmet kórsetýmen qatar pasıentterdi vokzal, aeroporttardan qarsy alý, qonaqúılerge ornalastyrý jáne taǵy basqa týrıstik kyzmetterdi óristetýdiń ońtaıly joldary da áńgimelendi.
О́mir ESQALI,
«Egemen Qazaqstan»
Soltústik Qazaqstan oblysy
