Sheteldik ınvestorlar aldaǵy ýaqytta Túrkistan qalasy men oblys aýmaǵynda óz jumystaryn bastaıdy. Tarata aıtsaq, Túrkistan oblysynyń ákimi Janseıit Túımebaev Irannyń «Ardabil Petrochemical Co» kompanııasymen jalpy quny 205 mln. dollar bolatyn onkologııalyq ortalyq pen munaı óńdeý zaýytyn salý jóninde memorandýmǵa qol qoıdy.
Al qytaılyq «Changchun Longyuan Power Equipment Co. LTD» kompanııasy 648 mln. AQSh dollar qarjyny energetıkalyq qurylǵylar men buıymdar jasaýǵa jumsaýǵa nıet bildirdi. Reseıdiń «Green Land Alatau» JShS-i 180 mln. AQSh dollaryna jylyjaı kesheniniń qurylysyn júrgizetin boldy. Sondaı-aq, forým barysynda túzilgen memorandýmqa sáıkes, qytaılyq «Shanghai Lianfu New Energy Science & Technology Group» kompanııasymen 340 mln.
AQSh dollaryna kún energııasymen júretin elektoavtobýstar shyǵaratyn zaýyt qurylysyn salý boıynsha kelisim túzildi. Týrkııadan kelgen «Dogus Insaat ve Ticaret A.S.» óndiris orny jalpy quny 100 mln. AQSh dollaryna ınfraqurylym salasyndaǵy jobalardy júzege asyrýda áriptestik tanytsa, ırandyq «Faradid Meehan» kompanııasy 5 mln. AQSh dollaryna kirpish zaýytynyń qurylysyn júrgizetin boldy.
Malaızııalyq «Nagasteel Equipment Sdn. Bhd.» kompanııasy 100 mln. AQSh dollaryna óńirde ınfraqurylymdy jáne ónerkásip salasynda iri jobalardy júzege asyrmaq. Túrkııalyq «Sallyr Bey Group» korporasııasy jalpy quny 15 mln. AQSh dolaryna qoı sharýashylyǵyn órkendetýge baǵyttalǵan fermanyń qurylysyn júrgizbek. Al qytaılyq «Jiangsu Huale Electric Co., ltd» kompanııasy qýattylyǵy 50 mVt-tyq kún elektr stansııasynyń qurylysyna 50 mln. AQSh dollaryn baǵyttaıtyn bolady. Sondaı-aq, Chehııa, Italııa, elderiniń kompanııalary Túrkistan oblysyna ınvestısııa quıýǵa qyzyǵyshýlyq tanytyp, naqty kelisimder jasaldy.
Ǵalymjan ELShBAI,
«Egemen Qazaqstan»
Túrkistan oblysy
