«Barys» degen laqap atqa ıe Balqashtyń balasy qashan da bul týraly: «Men úshin eń este qalǵan báseke – Qazaqstanda Aleks Gonsalespen ótken judyryqtasý, Álem chempıony tıtýlyn úshinshi ret qatarynan qorǵap qalýym edi. Oǵan Memleket basshysy kelip, men óte qýanyshty boldym. Biraq bári qas pen kózdiń arasynda óte tez aıaqtaldy» dep eske alady.
Aıtqandaı, Jırovqa «Barys» degen laqap esimdi bergen de, keıin ony «Balqashtyń barysy» dep áspettegen de ózimizdiń jýrnalıster.
Árıne boksshy Olımpıada chempıony, Álem chempıony ataqtaryna qol jetkizgenge deıin taǵdyry da, sporttaǵy mansaby da taqtaıdaı tegis bolmaǵany barshamyzǵa aıan. Alty birdeı balasyn jalǵyz ózi tumsyǵymen súırep júrip ósirgen anasy Nına Grıgorevna shesheıdiń úmitin aqtaǵan uldyń tarıhı sýreti tómendegideı sóıleıdi.
– Bul jekpe-jek 2001 jyly 6 aqpanda ótti. Ony Elbasy Nursultan Ábishuly Nazarbaev ta tamashalaıtyn boldy. Sport saraıy jankúıerlerge lyq toldy. Naǵyz anshlag edi. Biz sol kezdegi Elbasynyń jeke fotografy Iosıf Býdnevıch ekeýmiz býfetten kofe ishemiz dep júrip, zalǵa sál ǵana keshigip kirsek, rıngtiń aınalasynda tumsyq tyǵatyn jer joq. Ony BAQ ókilderi, fototilshiler, operatorlar qorshap alǵan. Men áreń degende eptep júrip, fotoapparatymdy qosyp, rıngke qaraı jaqyndaǵanym sol edi, Vasıa Alekstiń baýyr tusyna óziniń ońtaıly soqqysyn siltep jiberip, nokaýtqa bir-aq túsirdi. Fotoapparatty basyp úlgerdim. Kezdeısoq túsirilgen dál osy kadr búkil basylymdarda jaryq kórdi. Jekpe-jektiń eń ońtaıly jerinen aıaq astynan tapqan ornym sátti bolyp shyqty. Áıtpese, barlyq fotograftar aldyn ala ornalasyp, quraldaryn ońtaılap 12 raýndqa sozylýǵa tıisti jekpe-jekten keremet kadrlar túsirýge daıyndalyp turǵan-dy.
Meniń bilýimshe, báseke bar bolǵany shamamen 1 mınýt 45 sekýndqa ǵana sozyldy. Ertesine basylymdar 2 mınýtta ǵana aıaqtalǵanyn jarysa jarııalap jatty. Jırov jurtqa jekpe-jekti aıyzy qanyp tamashalaýǵa múmkindik bermedi, – deıdi Iýrıı Bekker.
Jattyǵý barysynda qalypqa syımaıtyn ádisterdi qoldana otyryp, jigeri men tózimin janyǵan Balqashtyń jigiti osylaısha, sporttyq ǵumyryndaǵy 27 nokaýttyń 25-shisin Almatyda júzege asyryp, «Akýla» atanǵan Aleks Gonsalesti birinshi raýndta-aq jalp etkizip, daýsyz jeńiske jetken. Senimdi derek kózderi sol joly jeńimpazdyń júldesi 150 myń AQSh dollaryn quraǵanyn aıtady.
Sóz sońynda qazir AQSh-ta tursa da Qazaq jerine jıi oralatyn Vasılıı Jırovtyń 2017 jyly ıslam dinin qabyldaǵanyn, sol jeńisti kúnderi qoltyqtasyp júrgen jary Rebekkamen ajyrasyp ketkenin aıta ketýge bolady.
Aınash ESALI,
«Egemen Qazaqstan»
ALMATY
