Elbasymyz óziniń jańa Joldaýy arqyly elimizdiń endigi baǵyt-baǵdary men aldaǵy mindetterin aıqyndap berdi. Bul Joldaýdyń eń basty ereksheligi – halyqtyń ál-aýqatyn arttyryp, turmys sapasyn jaqsartýǵa baǵyttalǵany bolyp otyr. Sol sebepti de ony eldiń ıgiligine baǵyttalǵan tarıhı qujat dep qabyldaýǵa ábden bolady.
Shyn máninde, Joldaýda aıtylǵan barlyq basymdyqtar mıllıondaǵan qazaqstandyqtardyń ómir súrý sapasyn jaqsartyp, olardyń básekege qabilettilikterin kóteretin tıimdi tetikter. Al bul – álemniń eń damyǵan 30 memleketiniń qataryna qosylýdy kózdeıtin biz úshin basty talaptardyń biri.
Prezıdent Joldaýda búginde jahandyq jáne jergilikti máselelerdiń shıelenise túskenin, mundaı tyǵyryqtan shyǵýdyń birden-bir joly adamnyń damýy ekenin aıtty. Sondyqtan da Úkimetke jáne barlyq memlekettik organdar men kompanııalarǵa jumys tásilderin ózgertýdi tapsyrdy. Bul qazaqstandyqtardyń ál-aýqatynyń ósýi elimizdiń eń basty basymdyǵyna aınalady degen sóz.
Jalpy, Memleket basshysynyń syndarly saıasatynyń arqasynda Qazaqstan táýelsizdiktiń alǵashqy jyldarynan bastap damýdyń dara jolymen júrip keledi. Biz osy ýaqyt aralyǵynda saıasat pen ekonomıkada úlken jetistikterge jettik. Túrli halyqaralyq forýmdar men jıyndardy joǵary deńgeıde ótkizip, álemdik qoǵamdastyqtyń senimin abyroımen aqtadyq. Sol arqyly dúnıe júzine beıbitshilik pen kelisimniń, senim men turaqtylyqtyń altyn besigi retinde tanyldyq.
Desek te, zaman bir ornynda turmaıdy. Qazir álemniń úlken ózgeristerdi bastan keshirip jatqany da belgili. Sol álemniń bir bólshegi retinde Qazaqstan da osy úderisterden tys qalmaıdy. Sondyqtan bizge endi atalǵan ózgerister men jahandyq syn-qaterlerge laıyqty tótep berýdiń jolyn qalyptastyrý asa mańyzdy. Al onyń negizi baı, bilimdi, deni saý ult ekenin Elbasy jańa Joldaýynda naqty kórsetip berip otyr.
Joldaýda aıtylǵan alty baǵyt ta halyqty alańdatqan eń ózekti jáne kúrmeýi qıyn máselelerdi ońtaıly sheshýge jol ashyp berdi. Sonyń ishinde eldiń tabysyn ósirý, turmys sapasyn odan ári jaqsartý, ómir súrýge jaıly orta qalyptastyrý, azamattardyń suranysyna saı memlekettik apparat qurý, syrtqy saıasattyń tıimdiligin arttyrý jáne árbir qazaqstandyqtyń elimizdegi ózgeristerge atsalysýyn qamtamasyz etýge baǵyttalǵan jańa mindetter halyqtyń kókeıinde júrgen kóptegen saýalǵa berilgen naqty jaýap boldy.
Ásirese Elbasynyń bilim berý, densaýlyq saqtaý, shaǵyn jáne orta bıznesti damytý, qoljetimdi baspana, quqyq qorǵaý organdarynyń jumysyn jetildirý, sybaılas jemqorlyqpen kúresti kúsheıtý, memlekettik qyzmettiń tıimdiligin arttyrý sııaqty halyqtyń kúndelikti ómirindegi salalarǵa erekshe mán berýi, eshbir ásireleýsiz, qazaqstandyqtardyń turmys sapasyn jańa deńgeıge kóteretin ıgi qadam. Sol sebepti de bul basymdyqtardy halyq birden qoldap, olardyń nátıjeli júzege asyrylýyna belsendi qatysatynyna kámil senemin.
Árıne bul basymdyqtar boıynsha osyǵan deıin de elimizde kóptegen baǵdarlamalar qabyldanyp, saıası, ekonomıkalyq, rýhanı jáne áleýmettik jańǵyrýlar qolǵa alynǵany belgili. Sondyqtan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty jańa Joldaýdy Memleket basshysynyń búginge deıingi barlyq bastamalarynyń laıyqty jalǵasy deýge tolyq negiz bar.
Elbasynyń senimdi tiregi, elmen etene jumys isteıtin partııa retinde «Nur Otan» Joldaýdyń máni men mańyzyn árbir qazaqstandyqqa túsindirip, onyń tabysty oryndalýy úshin óz úlesin qosatyn bolady.
