Sońǵy jyldary bul salaǵa memleket tarapynan úlken qoldaý kórsetilip, kúrdeli, aǵymdyq jóndeý jumystaryna qomaqty qarjy bólinip keledi. Elbasynyń dástúrli Joldaýynda atap ótilgendeı 2015 jyldan bastap 2400 shaqyrym avtomobıl joldary salynyp, qaıta jóndeldi. Al 2020 jylǵa taman qosymsha 4600 shaqyrym jol iske qosylady. Osy maqsatqa oraı bıyl qarjylandyrý kólemi kóbeıip, 150 mıllıard teńgege deıin jetip otyr. Rasynda da jol ekonomıkanyń kúretamyry, el men eldi, jer men jerdi jalǵastyratyn basty, negizgi býyn ekendiginde daý joq. Ony oblys ómirinen de aıqyn ańǵarýǵa bolady. Jalpy qoldanystaǵy avtomobıl joldarynyń uzyndyǵy 9 myń shaqyrymdy quraıdy. Bul jóninen elimizde úshinshi oryndamyz. Onyń 1468 shaqyrymy-respýblıkalyq, 2487 shaqyrymy-oblystyq, 5043 shaqyrymy-aýdandyq mańyzǵa ıe. Jergilikti joldardyń 58 prosenti ǵana qanaǵattanarlyq, 36 kópirdiń 7-ýi apattyq jaǵdaıda ekenin eskersek, keltirilgen sıfrlar sheshimin jedel tabatyn qordalanǵan problemalardyń az emes ekenin kórsetedi. Osy sebepti Memleket Basshysy bul salaǵa jumsalatyn qarajatty meılinshe ótkir máselelerge jumyldyrý mindetin, kólik-logıstıka ınfraqurylymynyń tıimdiligin arttyrý mindetterin qoıdy.
«Toǵyz joldyń toraby» sanalatyn Petropavl arqyly tranzıttik júk tasymalynyń, avtomobılder qozǵalysynyń alys-jaqyn shetelderge kúrt artýyna baılanysty ishki óńirlik qatynastardy jetildirýdiń múmkindikteri men rezevterin keńinen qoldanýdy qarastyryp otyrmyz. Byltyr jergilikti mańyzy bar joldardy jóndeýge respýblıkalyq qazynadan 11,1 mıllırd teńge jumsalyp, «Kellerovka-Chkalov» avtojolynyń 14 shaqyrymy jańǵyrtyldy. «Stanovoe-Novomıhaılovka, Smırnovo-Qııaly, Sergeevka-Tımırıazevo joldary jóndeldi. Sóz arasynda salqyndatylǵan resaıklıng ádisine negizdelgen ozyq tehnologııanyń engizilgenin aıta ketken jón. Nátıjesinde qurylys materıaldary únemdelip, eń bastysy, jol sapasy áldeqaıda jaqsardy. Sapa degennen shyǵady ,barlyq jóndeý sharalary qurylys normalary men erejelerge saı júrgizilip , memlekettik standarttar barynsha qatań saqtaldy.
Bıyl oblystyq, aýdandyq mańyzy bar joldarǵa bólingen qarajat tipti qomaqty, 14,7 mıllıard teńge. Onyń 10,2 mıllıard teńgesi el bıýdjetinen qarastyrylǵan. Jyl aıaǵyna deıin jarty myń shaqyrym joldy qalpyna keltiretin bolamyz. «Kellerovka-Taıynsha-Chkalovo» baǵytyndaǵy joldardy jańalaý odan ári jalǵasady. Toǵyz avtomobıl jolyna kúrdeli jóndeý júrgiziledi. Osylaısha alǵa qoıǵan aýqymdy mindetterdi júzege asyrý barysynda avtomobıl joldarynyń jaqsy jáne qanaǵattanarlyq deńgeıi 61 prosentke deıin kóterilmek. Qazirgi qarqynǵa qaraǵanda jobalanǵan meje oryndalady degen senimdemiz.
Prezıdentimizdiń Qazaqstan Respýblıkasynyń Qaýipsizdik keńesinde bergen tapsyrmasyna oraı «Jergilikti mańyzy bar jalpy qoldanystaǵy avtomobıl joldaryn damytýdyń 2019-2021 jyldarǵa arnalǵan baǵdarlamasy» iske qosylyp, erekshe serpin bergeli otyr. Bul joba boıynsha jyl saıyn 20 mıllıard teńge bólý qarastyrylǵan. Úsh jylda 1700 shaqyrym jol qalpyna keltiriletin bolady. Bul–buryn-sońdy bolmaǵan kórsetkish.
Jol ınfraqurylymyn damytýdyń basty basymdyqtaryn aıqyndap bergen Joldaý soltústikqazaqstandyqtardyń da tabysy men turmys sapasyna oń yqpal eteri daýsyz.
Vladımır BALAHONSEV,
oblystyq jolaýshylar kóligi jáne
avtomobıl joldary basqarmasynyń basshysy
Soltústik Qazaqstan oblysy
