Baıqaýdyń resmı saıtynda jarııalanǵandaı, «Aıka» kınotýyndysy reseılik Konstantın Habenskııdiń debıýttik jumysy – «Sobıbor», Belarýs kıno ónimi – Darıa Jýktyń «Hrýstal», ýkraındyq Sergeı Loznısanyń «Donbass» jáne qytaı rejısseri Szıan Venıanyń «Qupııa adam» (Hidden Man) fılmderimen birge «Úzdik sheteldik fılm» atalymynda saıysqa túsetin bolady. Atalǵan nomınasııa boıynsha baq synaıtyn «Oskar» syılyǵynan úmitker bes kartınanyń ishinen sýyrylyp shyqqan úzdiktiń esimi kınosúıer qaýymǵa 2019 jyldyń 24 aqpanyndaǵy 91-shi «Oskar» syılyǵyn tabystaý rásimine arnalǵan saltanatty jıynda jarııa etiledi.
«Bul – álemdik óte bedeldi syılyq jáne onyń birqatar talaptary bar. Qazaqstan atynan qatysýǵa talaı sheteldik bedeldi kınobaıqaýlarda jeńis tuǵyrynan kórinip júrgen otandyq rejısser Ámir Baıǵazın laıyqty úmitker bolar edi, biraq ýaqyt talabyna baılanysty onyń fılmin kelesi jyly ǵana usyna alamyz. Al «Aıka» týyndysy – ýaqyty, mártebesi jaǵynan eń qolaıly ónim bolyp otyr. Atalǵan kartınanyń «Kann kınofestıvaliniń jeńimpazy» degen ataǵy bar jáne shyn máninde nasıhattalýy tıis sapaly fılm. Qazaqstan úshin «Aıka» fılmin «Oskarǵa» usyný – úlken mártebe», dedi Mádenıet jáne sport vıse-mınıstri Aqtoty Raıymqulova halyqaralyq kınofestıvaldarǵa arnalyp uıymdastyrylǵan kezekti baspasóz jıynynda.
Nazerke JUMABAI,
«Egemen Qazaqstan»
