Dál qazir sharýashylyǵymda 1000 bas asyl tuqymdy iri qara, 1100 bas asyl tuqymdy kóshim jylqysy, 2000 bas etti-júndi «Aqjaıyq» tuqymdy qoıy bar. Elbasy Joldaýy qashan da damýdyń jańa múmkindikterine jol ashady. Onyń aıqyn dáleli – Ult Kóshbasshysynyń aýyl sharýashylyǵy ónimderin damytýǵa, aýyl sharýashylyǵy ónimderin tereń óńdeý salasyn odan ári damytýǵa erekshe kóńil bólýi. Odan keıin eksportqa shyǵarylatyn taýarlardyń túrin kóbeıtý, elimizdegi taýar óndirýshilerdi, olardyń ónimderin qoldaý máseleleri týraly da aıtyldy. Bul ekonomıkany jan-jaqty damytýǵa septesip, biz sekildi aýyl kásipkerleriniń múmkindigin ulǵaıta túseri sózsiz.
Memleket basshysynyń eksportqa baǵyttalǵan básekege qabyletti, sapaly ónim satý týraly tapsyrmasyna saı jaqyn arada Reseı Federasııasyndaǵy Tatarstan Respýblıkasyna asyl tuqymdy Kóshim jylqylaryn satýǵa shyǵarmaqpyz. Osynyń bári memleket tarapynan berilip kele jatqan demeýqarjy kómegi ekenin de aıta ketkim keledi.
Biz «Sıfrly Qazaqstan» memlekettik baǵdarlamasy aıasynda Aqjaıyqta oblysta alǵash ret «elektrondy baqtashy» júıesin, jaıylymda maldyń qaıda júrgenin, óristerdiń jaǵdaıyn, shabyndyqtyń sapasyn baqylap, monıtorıng jasap otyrýǵa drondy qoldandyq. Bizdiń josparymyz munymen shektelmeıdi. Memleket basshysynyń jańa Joldaýynda aýyl sharýashylyǵy salasyna jasalǵan múmkindikteri arqyly budan da joǵary kórsetkishterge jetetendigimizge senimdimiz.
«Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda «Aýyl – el besigi» jobasyn usynǵan Elbasy aýylsyz keleshek joq, ómir joq ekendigin sanamyzǵa quıyp berdi. Aýyldy qadirleý, aýyldy kórkeıtý, aýylǵa taǵzym etý – bolashaqqa alańdaý, keleshekke qamqorlyq jasaý. Bul jobanyń mazmuny Elbasynyń byltyr jarııalaǵan «Bolashaqqa baǵdar: Rýhanı jańǵyrý» baǵdarlamalyq maqalasymen astasyp jatyr. Aýylda ósip, bıznesimizdi órkendetken biz de ortaq isten tys qala almadyq. Bas kótergen azamattar jınalyp, altyn besigimiz – Alǵabas aýylyna zamanaýı sport alańyn salyp berdik. Aýylymyzǵa degen qamqorlyq munymen toqtalmaıdy, árıne.
Mine, Elbasynyń aýyldy el besigine teńep otyrǵany beker emes. Eńbek ónimdiligin jáne qaıta óńdelgen aýyl sharýashylyǵy ónimi eksportyn kóbeıtý, memlekettik qoldaýdyń barlyq sharalary elimizge zamanaýı ozyq tehnologııalardy aýqymdy túrde tartýǵa baǵyttalyp, salany basqarýdyń úzdik tájirıbesin paıdalaný, aýyl kásipkerlerine sharýashylyq júrgizýdiń jańa daǵdylaryn úıretý úshin jappaı oqytý júıesin qalyptastyrý sekildi bıylǵy Joldaýda jańalyqtar óte kóp boldy. Elbasynyń úkimetke úsh jyl ishinde osy maqsattarǵa jyl saıyn qosymsha 100 mlrd teńge qarastyrýdy tapsyrýy bizdi de qýantady. Endi sol alǵa qoıǵan mindetterdi memlekettik organdarmen birge júzege asyrýymyz kerek. Eń bastysy qoldaý bar, tek nátıjeli jumys jasaýymyz kerek.
Erbolat QURMANǴALIEV,
«Sábıt» sharýa qojalyǵynyń jetekshisi,
Aqjaıyq aýdany,
Batys Qazaqstan oblysy
