Festıvalge alys-jaqyn shetel teatrlarynan 150 spektakl qatysqan. Uıymdastyrý alqasy úsh irikteý kezeńin ótkizip, sońǵy synaqta tek segiz teatrdyń qoıylymyn sarapqa salǵan. Azamattyń aıtýynsha, ıdeıasy da, taqyryby da ár alýan, ár túrli rejısserlik qoltańbamen qoıylǵan ár baǵyttaǵy segiz spektakldiń ozyǵyn taný qazylar alqasyna ońaıǵa soqpaǵan. Qazaq eli atynan «28 teatry» nemis dramatýrgy Georg Bıýhnerdiń «Voısek» spektaklimen qatysty. Spektakldi jas rejısser Dına Jumabaı sahnalaǵan. Azamattyń teatry bul báıgede bas júldemen birge «eń úzdik akterlik ansambl» degen atalymdy da jeńip aldy.
«Voısek» spektaklinde Voısek – Azamat Satybaldy, Marııa – Ajarlym Baqytjanova, Tambýrmajor – Asan Májıt, Dáriger – Danııar Bazarqulov, Kapıtan – Álı Marat, Nurjan Ábýbákir sekildi tanymal teatr akterleri oınaıdy. Qazylar quramynda bolǵan KSRO halyq artısi, «Lenkomnyń» baıyrǵy aktrısasy Lıýdmıla Shashkına jáne ózge elderdiń belgili teatr synshylary da Qazaqstannan kelgen talantty jastardyń jumysyna joǵary baǵa berdi. «Bul Qazaqstandaǵy teatr óneriniń joǵary deńgeıde damyp kele jatqanynyń aıqyn kórinisi», desti olar.
«Voısek» – áli kúnge ózektiligin joımaǵan álem dramatýrgııasynyń jaýhary. Qatigez ómirdegi qarapaıym keıipkerdiń basynan ótken qasiretke toly taǵdyryn ǵasyrdan astam ýaqyt boıy júzdegen rejısser ózinshe jyrlap keledi. Anasynan adal týǵan, perishtedeı pák uldy aınalasynyń bári aldady, mańaıy mazaq qyldy, birtindep satty, eń aqyry tutastaı teris aınaldy. Ashyný, jaýyǵý, qyzǵanysh sezimderi aqyry Voısekti ózin qorlaǵandardan kek alýǵa jeteledi. Bir kezde ózi jaqsy kórgen, sengen, qudaıdaı tabynǵan jaqyn adamdaryna qyzǵanyshtyń qara qanjaryn suǵyp alǵanymen qoımaı, jaıbaraqat júre beretin sezimsiz, júreksiz tasmúsinge aınaldy...
Qasiretti dramanyń qazaq teatry sahnalaǵan nusqasynyń qazylar alqasynyń nazaryn aýdarýyna jas rejısserdiń jańashyl baǵytty, ózgeshe oı júıesimen qurǵan sony pishindi tańdaǵany sebep bolǵany anyq.
Aıgúl AHANBAIQYZY,
«Egemen Qazaqstan»
ALMATY
