Semeı qalasynda aktıvpen jáne jurtshylyq ókilderimen Prezıdent Joldaýynyńnegizgi baǵyttary talqylanady. Atap aıtqanda, halyqtyń tabys deńgeıin arttyrý, bilim berý men densaýlyq saqtaý sapasyn jaqsartý, turǵyn úıdiń qoljetimdiligi máseleleri qaralady. Buǵan qosa, Premer-Mınıstr birqatar áleýmettik jáne ónerkásiptik nysandardy aralap, solardyń negizinde óńirde «Nurly jol», «Nurly jer», «Densaýlyq» jáne t.b. memlekettik baǵdarlamalardyń iske asyrylýymen tanysady.
Oblys ortalyǵynda aktıvpen jáne jurtshylyqpen kezdesýde halyqtyń ál-aýqatyn arttyrýǵa baǵyttalǵan áleýmettik mindetterge basa kóńil bólinedi. Kóptegen máseleler, sonyń ishinde ındýstrııalandyrýdy, shaǵyn jáne orta bıznesti, AО́K damytýdyń, óńirlerdi turaqty damytýdyń jańa tásilderi qaralady. О́skemendegi óńdeý ónerkásibiniń iri nysandary men bilim berý mekemelerin aralaý josparda bar.
О́ńirge jasalǵan jumys sapary Semeı qalasynan bastaldy. Premer-Mınıstr ushyp-qoný jolaǵy men aerovokzaldy rekonstrýksııalaý nátıjesimen tanysty. Shyǵys Qazaqstan oblysynyń ákimi D. Ahmetovtyń baıandaýynsha, áýejaıdy jańǵyrtý reıster men jolaýshylar sanyn ulǵaıtýǵa, sondaı-aq, ushý kezindegi qaýipsizdik deńgeıin arttyrýǵa jol ashady.
2016 jylǵy jeltoqsanda «Nurly jol» memlekettik baǵdarlamasy aıasynda bastalǵan áýejaıdy rekonstrýksııalaý jumystary bıyl aıaqtalady. Jobany iske asyrý ushý-qoný jolaǵyn, jer ústimen júrý joldaryn jáne perrondy, sondaı-aq, aerovokzal ǵımaratyn jóndeýdi qamtydy. Ushý-qoný jolaǵyna qatysty jumystar tolyqtaı aıaqtalǵan: búgingi tańda atalǵan jolaq oblysaralyq jáne oblysishilik avıareısterdiń áýe kemelerin qabyldap, jóneltedi. Osy jyldyń 2 qyrkúıeginen bastap ushý-qoný jolaǵy «О́skemen — Semeı — Úrjar», «Semeı — Almaty», «Semeı — Astana» baǵyttary boıynsha An-24 tıpindegi ushaqtardy qabyldaıdy. Aerovokzalǵa qatysty jalpy aıaqtalǵan jumystar búginde 93% quraıdy.
Jańǵyrtý qorytyndysy boıynsha áýejaı «V» sanatyndaǵy halyqaralyq áýejaılarǵa arnalǵan IKAO (Halyqaralyq azamattyq avıasııa uıymy) talaptaryna saı bolady. Al bul 300 jolaýshyǵa deıin tasymaldaı alatyn Boeing, Airbus, IL-76 tıpindegi áýe kemelerin qabyldaýǵa múmkindik beredi. Iаǵnı, táýligine 25-30 reıske deıin, saǵatyna 200 adamǵa deıin qyzmet kórsetýge jol ashylady. Jolaýshylar termınalynyń ǵımaraty qaýipsiz paıdalaný talaptaryna jaýap beretin bolady, al ol jolaýshylarǵa qyzmet kórsetý sapasyn edáýir jaqsartady.
«Scat, Qazaq air, Bek air, Air Astana sekildi otandyq avıakompanııalardy tartýmen qatar, Reseı Federasııasyna, Túrkııaǵa, Mysyrǵa, Birikken Arab Ámirlikterine halyqaralyq reısterdi uıymdastyrýǵa múmkindik týady. Aerovokzalda halyqaralyq jáne ishki áýe qatynastarynyń jekelegen zaldary paıda bolady, zamanaýı tekserý jabdyǵy ornatylady. Jalpy, keshende 250-den astam adamǵa jumys orny ashylady», — dep baıandady Shyǵys Qazaqstan oblysy ákiminiń orynbasary S. Aqtanov.
Eske sala keteıik, Premer-Mınıstr Memleket basshysynyń tapsyrmasymen el óńirlerin jumys saparymen aralap júr. Osyǵan deıin Baqytjan Saǵyntaev Atyraý, Aqtóbe, Qaraǵandy, Qostanaı, Qyzylorda, Mańǵystaý, Ońtústik Qazaqstan (qazirgi Túrkistan), Batys Qazaqstan, Soltústik Qazaqstan, Aqmola jáne Pavlodar oblystarynda jumys saparlarymen boldy.
