Foto: Erlan Omar
«Sezge qatysýshylar men meımandar! Sizderdi Qazaqstan eline qurmetpen kelip jáne sizderdi qabyldaǵanym úshin shyn júrekten zor qýanyshqa bólenemin».
Prezıdent dinı kóshbasshylardy qazaq jerinde qarsy alǵanyna shynaıy qýanyshty ekenin jetkize otyryp, 2003 jyly alǵashqy tarıhı sezdiń ótkenine 15 jyl tolǵanyn atap ótti. «Álemdik jáne dástúrli dinder kóshbasshylary sezin onyń vızıtkalyq kartasy dep ataýǵa bolady. Sebebi biz bul qalany elordamyz Astanany barlyq mádenıetterge ashyq Eýrazııanyń bolashaq qalasy retinde saldyq», dedi Memleket basshysy.
Sondaı-aq Elbasy saıasatkerler men dinı qaıratkerlerdi dinaralyq jáne dinishilik qaıshylyqtar alańdatpaı qoımaıtynyn aıtty.
«О́tken sezden bergi 3 jyldyń ishinde Qazaqstan elordasynda jahandyq deńgeıdegi mańyzdy sharalar uıymdastyryldy. Astanada qabyldanǵan sheshimder halyqaralyq keń rezonansqa ıe boldy. О́ıtkeni, ol bitimgershilik, seriktestik, toleranttylyq jáne jasampazdyq ıdeıalaryn sińirgen. Bul barynsha mańyzdy. Sebebi álem, ókinishke oraı, týrbýlenttik jaǵdaıǵa enip otyr. Bizdiń barlyǵymyzdy, saıasatkerler men dinı qaıratkerlerdi sanksııalyq teketirester, dinaralyq jáne dinishilik qaıshylyqtar, saýda soǵystary, qorshaǵan ortanyń lastanýy alańdatpaı qoımaıdy», dedi ol.
Sonymen qatar Prezıdent úshinshi myńjyldyqta 18 jyl ómir súrgenimizge qaramastan adamdardyń aqyl-oılary men júrekterinde jatsynýshylyq kúsheıgenin aıtty.
«Biz úshinshi myńjyldyqta 18 jyl ómir súrýdemiz. Biraq, beıbitshilik, ál-aýqat pen molshylyq adamzat damýynyń negizgi tendensııasyn aınala almady. Álemdik qoǵamdastyq ózara senimsizdik, jek kórýshilik jáne janjaldardyń zulymdyq sheńberinen shyǵa almady. Biz jaǵdaı túzelmek turmaq nasharlaı túskenin kórip otyrmyz. Elder men saıası bloktar arasynda jańa qabyrǵalar, jańa temir shymyldyqtar turǵyzylýda. Biraq eń qaýiptisi - adamdardyń aqyl-oılary men júrekterinde ózara jatsynýshylyq kúsheıe túsýde», dedi Memleket basshysy.
Aqmaral AǴZAMQYZY,
«Egemen Qazaqstan»
