Beıbit kúnniń batyrlary

Kúni keshegi Qeńqııaq, Shu­bar­shı eldi mekenderinde bolǵan keleńsiz oqıǵa óńirdi ǵana emes, elimizdi dúr silkindirgeni ras. Dindi betperde etip jamylyp, el ishin dúrliktirgen qanype­zer­lerdiń qylyǵyn eshkim de aqtaı almasa kerek. Beıbit eldiń ty­nyshtyǵyn buzǵan basbuzar­lar­dy aýyzdyqtaý kezinde erliktiń úlgisin kórsetken batyr ulda­rymyz óz qyzmetterine degen adaldyqtyń úlgisin kórsetti. Olar keýdelerin oqqa tósep, beıbit eldiń tynyshtyǵyn qor­ǵaýda janqııarlyqqa bardy. Árıne, eli úshin jas ǵumyr­la­ryn qıǵan qazirgi zamannyń has batyrlary qandaı da qurmetke laıyq. Olardyń bul erlikterdi ataq-dańq úshin emes, egemen elimizdiń tynyshtyǵy úshin ja­saǵany da aqıqat. Bul eń aldy­men, eli, týǵan halqy úshin qa­syq qanyn qııatyn ata dástúrdiń úzilmegendigin kórsetse, ekinshiden, jas urpaqtyń patrıottyq seziminiń myqtylyǵyn taǵy bir dáleldedi. Osyndaı batyr uldary bar eldiń erteńi de ómirsheń ekeni sózsiz. Jyl sońynda Elbasy Nur­sultan Nazarbaevtyń Jarlyǵy­men qyzmet babynda qaıtys bolǵan 4 qyzmetker elimizdiń joǵary nagradalaryna ıe bol­dy. Olardyń arasynan Temir aýdandyq ishki ister bóliminiń polısııa serjanttary Nurlan Alpysbaı men Aıdos Boranbaev III dárejeli, Aqtóbe obly­synyń IID Ekstremızmmen kú­res bas­qarmasynyń qyzmetkeri, polısııa kapıtany Rústem Kenjalın men «Arlan» arnaıy jasaǵy­nyń qyzmetkeri, polısııa aǵa leıtenanty Rýslan Joldy­baev II dárejeli «Aıbyn» ordenderimen marapattaldy. 30 jastaǵy polısııa serjan­ty Nurlan Alpysbaı Aqtóbe oblysynyń Shalqar qalasynda dúnıege kelgen. Ol ishki ister organynda 2002 jyldan beri qyzmet etken edi. Aıdos Boranbaev 39 jas-aq ómir súrdi. Aıdos ishki ister organynda 6 jyl qyzmet atqarǵan. Eki azamattyń artynda qos-qostan balalary qaldy. 35 jastaǵy «Arlan» arnaıy jasaǵynyń qyzmetkeri, polısııa aǵa leıtenanty Rýslan Joldybaev 2011 jylǵy 1 shilde kúni qylmyskerlerdi quryqtaý arnaıy operasııasy barysynda Keńqııaq kentinde qaza tapty. Rústem Kenjalın óz árip­testerimen jedel aqparatty tek­serý maqsatynda saıajaıda salynyp jatqan úıdiń mańyna kelgen. Sol mańda jas kelinshekti kórgen polısııa qyzmet­kerleri úıdi tekserip shyǵý úshin atalmysh áıelden ruqsat alyp, birinshi bolyp úıge bas suqqan Rústemge oq atylyp, jarylys bolady. Rústemniń qasyndaǵy áriptesteri qas-qaǵym sátte esh­qandaı shara jasaı almaǵan. Salynyp jatqan úıdiń shatyry kókke ushqan sátte qaza tapqan Rústemniń denesiniń áreń ta­bylǵandyǵynan-aq jarylystyń tym kúshti bolǵanyn ańǵarý qıyn emes. Astana qalasynda Rústem Kenjalınniń zaıyby IIM mınıstri Qalmuhanbet Qa­symovtyń qolynan marapatty qabyldap aldy. Atalǵan tórt polıseı de qylmystyq toptyń kózin joıýǵa atsalysqan eńbek­teri úshin marapattaldy. Sonymen birge, Temir aýdan­dyq ishki ister bóliminiń polısııa serjanty Turarbek Eshpa­ǵan­betovke III dárejeli «Aı­byn» ordeni tabystalsa, «Arlan» arnaıy jasaǵynyń sarba­z­dary, polısııa maıory Búrkit Sartaev, kishi polısııa leıte­nant­tary Suńǵat Tájiǵulov pen Jasulan Abıbolaev II dáre­jeli «Aıbyn» ordenin omyraý­la­ry­na taqty. Bul oraıda batyl uldary­myz­dyń biri, polısııa maıory Búrkit Sartaevpen áńgimelesý­diń sáti tústi. Sol qarýly qaq­tyǵysta alǵan jaraqatynyń saldarynan aýrýhana jaǵalap júrgen ol ýaqytynyń tapshy­ly­ǵyna qaramastan ótinishimizdi jerge tastamady. Júzinen jy­lylyq seziledi. Adamǵa degen yqylasy men qurmeti qandaı. Janyna batqan jaraqatyn da bildirgisi joq. Shalqar aýdany Qaıyr aýy­lynda dúnıege kelgen Búrkit Sársenbaıuly 1990-1992 jyl­dary Germanııanyń Frankfýrt qalasynda ásker qatarynda aza­mattyq boryshyn ótep oralǵan­nan keıin birden ishki ister or­ganyna qyzmetke ornalasqan. Keı­in Aqtóbe oblysynyń IID «Arlan» arnaıy den qoıý ja­saǵyna aýysqan. Basyńdy qaýip-qaterge tigetin mundaı kúsh qu­rylymdaryna ekiniń birin ala bermeıtinin eskersek, onyń qa­tal synaqtardan múdirmeı ótke­nin paıymdaý qıyn emes. – Ol oqıǵanyń qalaı bolǵa­ny, arty qalaı aıaqtalǵany qa­lyń jurtqa belgili. Qaraqshy­lar qamys arasynda jasyry­nyp jatyp, atys bastalyp ketti. Biz barymyzsha qyzmettik mindetimizdi ótedik. Meniń or­nymda kim-kim de osylaı áreket eteri sózsiz. Sondyqtan asyra aıtatyndaı eshteńe joq. Bári­nen buryn jan joldasymyz Rýslan Joldybaevtyń bizdi qor­ǵap, keýdesin oqqa tosqan erligin aıtsańyzshy. Naǵyz azamat, naǵyz saqshy osyndaı bolýy kerek. Sol qaqtyǵysta qolymnan jaraqattanyp, tikushaqpen ob­lys ortalyǵyna jetkizildim. Sol jaraqattan áli aryla almaı júrmin. Bastysy, bas aman, densaýlyq ornyna keledi dep oılaımyn dep qysqa qaıyrdy áńgime tizginin, Búrkit Sársen­baı­uly qyzmettik ádeppen kóp nárseni aıta bermeıtin tártip­tiligine basyp. Ol qarapaıym otbasynda, on balanyń ortasynda tárbıelen­di. О́zi qalaǵan qyz­mettiń ys­tyq-sýyǵyna úırengen onyń eńbek jolyn qaıta bastasa osy soqpaqqa túseri sózsiz. Ony az ǵana til qatysý kezinde anyq ańǵardyq. Keshegi qandy oqıǵa kezinde otbasyń, anań qatty ýaıym­da­ǵan bolar dedik biz áńgime ar­na­syn ózgertkimiz kelip. – Qyzmet babynda ne bola­ryn kim boljapty. Alaıda, anam Jupar keshegi qan qasap soǵysta bolǵan maıdangerdiń ja­ry ǵoı asa qobaljymasa kerek. Degenmen, balasyn kim ja­mandyqqa qııady, – dedi ol óz oıyn búkpesiz jetkizip. Búrkit Sartaev zaıybymen ekeýi eki ul tárbıelep ósirýde. Otbasynda jaqsy jar, súıikti áke. Qyzmettesteri arasynda bedeldi, inige qamqor, aǵaǵa izetti ul uıada kórgen ónegesimen óz­gelerge úlgi bolýda. Sondyqtan da bolar, áriptesteri ony sózden góri istiń adamy retinde baǵa­laıdy. Al qandaı jaǵdaıda da adamı qasıetinen, jigittik na­my­synan aınymaıtyn Búrkit qashanda, qandaı jaǵdaıda da ózgelerge ónege bolar adamgershilikti joǵary ustaıdy. Erdiń eri synalar syn saǵatta ba­tyldyǵymen kózge túskenderdiń biri retinde osylaı dep sóz aı­týdy paryzymyz sanadyq. Bú­gingi kúnniń Baýyrjandary ara­myzda júrgenine rıza bolǵa­ny­myz da ras. Polısııa maıory Búrkit baýyrymyzdyń omyraý­yn­da II dárejeli «Aıbyn» or­deniniń jarqyraýy da zańdy. Erlik osylaı baǵalansa kerek. Satybaldy SÁÝIRBAI. Aqtóbe oblysy.