San ǵasyr erkindik, bostandyq jolynda qıly-qıly zaman ótkizgen ata-babalarymyzdyń arýaqtary rıza bolyp jatqan shyǵar. Sol táýelsizdikke jetken búgingi urpaq sony sezine otyryp, Kók baıraǵyn qolyna berik ustap ósip-órkendeý, damý jolyna ómirin arnaýy kerek dep bilemin. Bul jolda Elbasymyz Nursultan Nazarbaev erekshe úlgi-ónege kórsetýde.
Táýelsizdiktiń 20 jyldyǵy keń túrde turmys-tirshiliktiń qaı salasynda bolmasyn úlken jetistikpen atalyp ótkenin kózimiz kórdi. Mereıli mereke, uly toı bolyp ótkeni ár qazaqstandyqtyń kóńiline nár, boıyna qýat qosqany sózsiz. Táýelsizdikke arnalǵan saltanatty jıynda sóılegen N.Nazarbaev elimizdiń áleýmettik-ekonomıkalyq, mádenı-ǵylymı damýyna, Qazaqstan halqynyń birligi men yntymaǵynyń nyǵaıýyna basa nazar aýdaryp, bolashaǵymyzdyń baǵyt-baǵdaryn aıqyndap berdi. Tóbeń kókke jetkendeı, kóńil-kúıiń ósip kóterilip qalady ekensiń.
Jıyrma jylda táýelsizdikti baıandy etip, irgemizdi bekitip alý jeńil ótti demesek kerek. Ár túrli qıyndyqtar, kedergiler, zııankestikter az bolǵan joq. Ekonomıkalyq-áleýmettik jáne saıası qıynshylyqtar da kezdesti. «Alysqa siltep sonsha qaıda barady?» dep odyraıǵandar da bolmaı qalǵan joq. Osynyń bárin jeńe otyryp, eńseli el, myqty memleket dárejesine jetkenimizdi qalaı maqtanysh etpeı tura alamyz. 1991 jyldyń ózinde Qazaqstan Respýblıkasy atalýy, onyń Memlekettik táýelsizdigi týraly Konstıtýsııalyq Zań qabyldanýy, Memlekettik rámizderi – Eldiń Týy, Eltańbasy jáne Ánuranynyń qabyldanýy esten ketpes erekshe qubylys.
Qazaqstannyń Táýelsiz elge, derbes memleketke aınalǵanyna álemdegi aıtýly memleketter de kóz tigip, moıyndap otyr. Ári táýelsizdiginiń qaýipsizdigine kepildik berdi. Demek, olarmen terezesi teń el qataryna qosylǵanymyz osy emes pe.
Mine, asa maqtanarlyq zor dárejege jetýimizge Elbasynyń basshylyq jasap, qıyn da kúrdeli jyldarda elin sońynan erte bilip, mol jetistikterge jetkizýi kóńilimizdi kórkeıtedi. Aldaǵy asýlar da az emes. Sol úshin janǵa qýat beretin kógildir Týymyz máńgi jelbiresin.
Toqtar BEIISQULOV, jazýshy, professor.
ALMATY.
