О́tip bara jatqan jyldyń erekshe oqıǵasy el Táýelsizdiginiń 20 jyldyq merekesin halyq bolyp tolymdy tabystarmen atap ótý boldy. Bul týraly Elbasynyń Qazaqstan Respbýlıkasy Táýelsizdiginiń 20 jyldyǵyna arnalǵan saltanatty jınalysta sóılegen sózinde jan-jaqty aıtyldy.
Mysaly, alǵashqy onjyldyqta myqty ekonomıka men kúshti memleketimiz qalyptasty. Ekinshi onjyldyqta ósim men kúsh jınaqtaý kezeńi boldy. Elbasy osy jetistikterdi aıta kelip, endi úshinshi jáne tórtinshi onjyldyqtardy elimiz úshin alǵa tarıhı sekiris dáýiri bolady dep tujyrdy.
Oǵan, árıne, negiz bar. Qazaq eli óz tarıhynda tuńǵysh ret EQYU-ǵa tabysty tóraǵalyq etti jáne Astanada EQYU-nyń HHI ǵasyrdaǵy birinshi jáne ázirshe jalǵyz sammıtin ótkizdi. Qasym-Jomart Toqaevtaı azamatymyz BUU-da Uıym tóraǵasynyń orynbasary bolyp abyroımen ókildik etýde. Munyń bári búginde bizdiń elge álemdik qaýymdastyqtyń senimi artyp kele jatqanyn kórsetedi.
Deıturǵanmen, Elbasy taıaýdaǵy jyldardyń jaýapkershiliginiń zor ekenin de aıtyp ótti. Elbasynyń tilimen aıtsaq, Qazaqstan – birtutas jer, birtutas halyq, birtutas bolashaq. Sondyqtan halqymyz Táýelsiz el bolyp attaǵan altyn ǵasyrdy ardaqtaı bileıik. Basymyzǵa qonǵan baqty óz qolymyzben úrkitip almaıyq. Aıtaqqa erip, attanǵa qosylýdyń sońy – adasý. Elimizdegi turaqtylyq pen kelisim, údemeli ındýstrııalandyrý, ınnovasııalyq damý men ıntegrasııa baǵytyn bir atanyń balasyndaı, bir qoldyń salasyndaı qorǵap, qoldaı bilsek qana baqytqa jetemiz.
Qoıan jylyna qosh-qosh aıtyp, al kele jatqan Ulý jylyn qýana qarsy alyp turyp, zamandastaryma jáne jastarǵa aıtar aq tilegim osy.
Baǵban TAIYMBETOV, Jambyl oblysynyń prokýrory.
Jambyl oblysy.
