Patrıottar partııasynyń Almaty qalalyq komıtetiniń birinshi hatshysy Gúldana Nurpeıisova jáne ózge de belsendi músheleri keshe qalalyq jol polısııasy bólimine arnaıy bas suqty. Onda jol polısııasynyń jumysy men olardyń mártebesi jáne jol qaýipsizdigi sııaqty máseleler keńinen sóz boldy. Sonyń ishinde jol polısııasy qyzmetkerleriniń áleýmettik paketterin engizý qajettigi, jalaqylarynyń joǵary bolýy jáne zeınetaqymen qamtamasyz etýdiń jetildirilýi qajettigi de nazardan tys qalǵan joq.
Osy oraıda partııa tarapynan qalalyq jol polısııasy ǵımaratynda osy sala qyzmetkerleri aldynda arnaıy jańajyldyq konsert uıymdastyrylǵandyǵyn da aıta ketý kerek. Sonymen qatar, partııa belsendileri kóshe-kóshe boıymen júrip ótip, qala turǵyndarymen júzdesti. Budan basqa patrıottar qalalyq jedel járdem stansasyna baryp, munda da konsert uıymdastyrdy. Artynan medısına qyzmetkerleriniń basyndaǵy jaǵdaı áńgime ózegine aınaldy. Dárigerlerdiń jalaqysyn kóterý, qazirgi zamanǵa saı qural-jabdyqtarmen qamtamasyz etý máseleleri kóterildi. Jol polısııasy men jedel járdem qyzmetkerleri de jańa jylda jumys oryndarynda bolatyndyǵy belgili. Kúndiz-túni tynym tappaıtyn osy sala qyzmetkerleriniń jaǵdaıy jan-jaqty jasalýy kerek, sonyń ishinde jalaqylaryn kóterý kerek, dep esepteıdi patrıottyqtar.
Sondaı-aq patrıottyq belsendiler Almatydaǵy Máńgi alaýǵa baryp gúl shoqtaryn qoıyp, Aýǵan jáne Uly Otan soǵysynyń sheıit bolǵan ardagerlerine taǵzym etti. Uly Otan soǵysy kezinde qazaqstandyq Panfılov dıvızııasy Máskeý túbinde nemisterdiń shabýylyna toıtarys bergeni tarıhtan belgili. Partııa sol erlik eshqashan umytylmaıtyndyǵyn osylaısha bildirdi. Sonymen birge, patrıottyqtar Uly Otan soǵysy men Aýǵan soǵysy ardagerleriniń qazirgi jaǵdaıyn aıta kelip, olarǵa únemi kóńil aýdarylýy qajettigin ortaǵa saldy.
Osy rette partııa aýla, shaǵyn aýdan, kóshelerde de kezdesýler ótkizip, qarapaıym qala turǵyndarymen júzdesip, nasıhat jumystaryn júrgizip kele jatqanyn aıta ketken jón.
Asqar TURAPBAIULY.
