Keshe Jalpyulttyq sosıal-demokratııalyq partııanyń teń tóraǵasy Jarmahan Tuıaqbaı jáne partııanyń bir top basqa belsendileri Almatynyń Túrksib aýdanyndaǵy Baqaı shaǵyn aýdanynyń turǵyndarymen kezdesý ótkizdi.
Kezdesý barysynda partııa belsendileri ózderiniń saılaýaldy tuǵyrnamasymen tanystyryp, eldi odan ári demokratııalandyra túsý reformalaryn engizý boıynsha birqatar oılaryn ortaǵa saldy. Sonyń ishinde keıbir memlekettik organdardyń sylbyr jumystaryna qatty syndar aıtyldy.
Kezdesý kezinde Jańaózen oqıǵalary boıynsha da JSDP ustanymdary jarııa etildi. Partııa belsendileri ondaǵy jappaı tártipsizdikti uıymdastyrǵandar men órteý, qıratý, búldirý isterine belsene qatysqandardy prokýratýra organdary taýyp, zańǵa sáıkes tıisti jazasyn berýleri kerektigin aıtty. Sonymen birge, keıbir, ot qarýyn orynsyz qoldanǵan polısııa qyzmetkerleri de jazasyn tartýlary kerek degen usynystary bary jetkizildi. Jańaózenniń áleýmettik máseleleri de tezirek sheshilip, jumystan zańsyz shyǵarylǵandardyń qalpyna keltirilýi qajettigi de sóz boldy.
Jınalǵan turǵyndar tarapynan kóptegen suraqtar qoıyldy. Sonyń ishinde osy shaǵyn aýdan turǵyndarynyń áleýmettik máselelerin sheshý jetkilikti dárejede oryndalmaı jatqandyǵy sóz boldy. Ásirese, qoǵamdyq kólik, jol, sýmen qamtıtyn qyzmetter salasyna birtalaı syndar bar ekeni belgili boldy.
Ústimizdegi jyly Almaty qalalyq máslıhatynyń sheshimimen shaǵyn aýdannyń «Baqaı» ataýy ózgerip, ol «Jas qanat» degen jańa at alǵan bolatyn. Sodan beri memlekettik jer aktileri qoldarynda bar azamattardyń birqatary qalalyq tirkeýden ótip, qaladaǵy barlyq áleýmettik qyzmetterdiń paıdasyn kórip otyr. Ondaı otbasylardyń sany 400-ge jýyq. Al jerdi stıhııaly túrde basyp alyp, turǵyn úılerdi oryndy-orynsyz salyp alǵandar áli kúnge qujattaryn tolyq alyp úlgergen joq. Osyndaı turǵyndardyń JSDP belsendilerine aıtqan ótinishteri de, túrli qyzmetterge aıtqan syndary da kóp boldy.
Jalpy, kezdesý eki taraptyń da qyzyǵýshylyǵyn týdyrǵan ótkir pikirsaıys túrinde ótti.
Jaqsybaı SAMRAT.
