— Andorraǵa qarsy kezdesýde jas fýtbolshylarǵa múmkindik beresiz be?
— Toptan shyǵýǵa múmkindigimiz tómendegenin jasyrmaımyn. Biraq biz týrnır kestesine qaramaı, birinshi oryn úshin kúresetinimiz anyq. Erteńgi oıynǵa qaı fýtbolshy daıyn, sol oıynshyny shyǵaramyz. Olardyń arasynda jas fýtbolshylar da bolýy múmkin. Sondaı-aq ótken matchta kózge túse almaǵan fýtbolshylar erteńgi oıynda ózin kórsetý kerek dep esepteımin.
— Latvııadaǵy oıynda quramaǵa ne jetispedi dep esepteısiz?
— Bizdiń jeńiske degen qushtarlyǵymyz tasyp turdy. Gol soǵatyn birneshe múmkindik bolǵanymen, bolmaıtyn jerde qaqpamyzǵa gol ótkizip aldyq. Fýtbolshylar kóbirek senimdi oınap, áli de sheberlikterin shyńdaý kerek. Senimdilik bar jerde jeńistiń ózi-aq keletinin belgili.
— Jańa siz birneshe fýtbolshynyń oıyny kóńilden shyqqan joq dep aıtyp qaldyńyz. Olar ne úshin kóńilińizden shyqpady?
— Menińshe, olar ózderiniń oıynyn kórsete almady. Olar budan da jaqsy oınaýy tıis edi. Erteń ózge oıynshylarǵa da múmkindik berip kórmekshimin. Sondaı-aq áli tolyq áleýetin kórsete almaı júrgen fýtbolshylar da bar.
— Baýyrjan Islamhan erteń alańǵa shyǵa ala ma?
— Ol Latvııaǵa qarsy oıynda azdap jaraqat alyp qalǵan bolatyn. Biraq, tolyq quramda jattyǵý jasap júr. Bálkim alańǵa shyǵyp qalýy da ǵajap emes. Qaqpashy Nepogodovtyń quramadaǵy debıýtine áli biraz ýaqyt bar. О́ıtkeni, qazir Erıchten asatyn qaqpashy joq.
Álı BITО́RE,
«Egemen Qazaqstan»
