Saılaý aldyndaǵy úgit-nasıhat jumystarymen aınalysyp júrgen «Ádilet» partııasy buqara halyqqa neǵurlym jaqyn kelýdiń joldaryn izdestirip otyrǵany baıqalady. Oral qalasyndaǵy óndirýshi jáne óńdeýshi kásiporyndarda ári azyq-túlik satatyn nysandarda kóshpeli konferensııalar uıymdastyrýǵa uıytqy bolǵandary osy pikirimizdiń dáleli.
Atalǵan is-sharalardyń mazmunyn baıytý úshin Aqjaıyqqa «Ádilet» partııasy tóraǵasynyń orynbasarlary Ýálıhan Qaısarov pen Mádı Artyǵalıev keldi. Olarǵa jol kórsetip júrgenderdiń qatarynda partııanyń oblystyq fılıalynyń jetekshisi Muhıt Bısenǵalıev pen onyń orynbasary Nurlan Táshimov bar.
Kóshpeli konferensııa oblystaǵy birqatar nysandar men ujymdardy qamtydy. Ásirese, Oral gaz-týrbınaly elektr stansasynda ınjener-tehnık qyzmetkerlermen bolǵan basqosý qyzý ótkizildi. Budan keıin ádilettikter Oral qalasyndaǵy «El yrysy» kommýnaldyq bazaryna atbasyn burdy. Osy jerde olar ózderiniń úgit-nasıhat paraqshalaryn taratyp, bazardaǵy baǵanyń jaı-kúıimen tanysty.
– Respýblıkamyzda azyq-túlik baǵalaryn retteý men kommýnaldyq qyzmet salasynda sheshilmegen túıinder jetkilikti. Bul oraıda naqty isterden góri, eshqandaı paıda bermeıtin qyzyl sózderdiń kóbeıip bara jatqany bizdi alańdatady. Tarıfterdi ósirmeı, kommýnaldyq qyzmet órisin jańa satyǵa kóterip, azyq-túlik baǵalaryn jyldyń tórt mezgilinde turaqty qalypta ustamaıynsha, áleýmettiń kóńili jaılana qoımaıdy. Árıne, ǵalamdyq qubylystardyń ishki naryqqa áser etetinin joqqa shyǵarýǵa bolmaıdy. Soǵan qaramastan, úkimet onyń salqyny men zardaby halyqqa barynsha az áser etýin qadaǵalaýy tıis, – dep óz oı-pikirin bildirdi konferensııada «Ádilet» partııasy Batys Qazaqstan oblystyq saılaý shtabynyń jetekshisi Baýyrjan Qazıev.
Bul kúnderi «Ádilet» partııasy Parlament Májilisi depýtattyǵynan úmitkerler tizimine engizilgen adamdardan úkileýmen birge, máslıhattarǵa da birshama kandıdattaryn usynǵanyn aıta ketken jón.
Temir QUSAIYN.
Batys Qazaqstan oblysy.
